हर्क बिरुद्द आन्दोलन गर्ने वाइसियलको चेतावनी

योङ कम्युनिस्ट लिग (वाइसियल) नेपालले धरान उपमहानगरपालिकाका मेयर हर्क साम्पाङ बिरुद्द कडा भन्दा कडा आन्दोलन गर्ने चेतावनी दिएको छ । मेयर साम्पाङले फेसबुक स्ट्याटस लेखेर जनयुद्धमा शहादत प्राप्त गरेका सहिदहरूको अपमान गरेको ठहर गर्दै नेकपा माओवादी केन्द्र निकट योङ कम्युनिष्ट लिग वाइसीएलले एक वक्तव्य मार्फत यस्तो घोषणा गरेको हो । साम्पाङले फेसबुक स्ट्याटस ‘मान्छे मारेर आउने मुलेहरुले मलाई विधि र प्रक्रिया सिकाउने, इन्द्रको अगाडि स्वर्गको बखान्’ लेखाइप्रति वाइसीएलले आपत्ति जनाएको हो । वक्तव्यमा मेयर साम्पाङले आफ्नो बोलीचाली सच्याएर सभ्य भाषा नबोले उनी विरुद्ध कडा आन्दोलन गर्ने चेतावनी दिएको छ ।

वाईसीएलले मेयर साम्पाङलाई अमर्यादित र असभ्य शब्द प्रयोग गरेर नबोल्न चेतावनी दिँदै जनताको त्याग, तपस्या र बलिदानबाट प्राप्त गणतन्त्र र १० वर्षे जनयुद्धको जगमा स्थापित संविधानको आधारमा बनेको स्थानिय सरकारकै प्रमुखबाट जनयुद्धप्रति जथाभाबी बोलेर सहिदको अपमान गरेको विज्ञप्तिमा उल्लेख छ ।वाईसीएल धरानका अध्यक्ष दीपक तामाङले बिहीबार जारी वक्तव्यमा आफ्नो जग र धरातल बिर्सिएर नगरप्रमुखको हैसियत भुल्दै जथाभाबी सामाजिक सञ्जालमा नलेख्न, जथाभाबी नबोल्न र धरान लज्जित हुनु पर्ने अवस्था सृजना नगर्न, अराजकतापूर्ण व्यवहार, अशिष्ट बोली बचन सच्याउन आग्रह गरेका छन् ।