पाचौ हप्तामा पनि सफलताकासाथ प्रदर्शन भैरहेको नेपाली कथानक चलचित्र “जारी” का सम्पूर्ण कलाकारहरुलाई पुर्वका सिनेमाहलहरुमा भव्य स्वागत भएकोछ । निर्माण टिम सहित लेखक तथा निर्देशक उपेन्द्र सुब्बा , कलाकारहरु दयाहाङ राई , मिरुना मगर ,प्रेम सुब्बा , बिजय बराल , रेखा लिम्बु र कार्यकारी निर्माता मणिराम पोखरेल लगायतको टिम पुर्वका दर्शकहरुलाई धन्यवाद दिन सिनेमाहलहरु भिजिटी गरेका हुन । पुर्वका धरान , इटहरी , दमक र बिर्तामोडका सिनेमाहलहरुमा टिमले दर्शकसँग बसेर फिल्म हेरेका थिए । सोमबार धरान ८ बराह कम्प्लेक्स स्थित फ्रेण्ड्स सिनेमाहलमा बिशेष कार्यक्रम को आयोजना गरिएको थियो । कार्यक्रममा धरान उपमहानगरपालिका का मेयर हर्क साम्पाङको प्रमुख आतिथ्यता थियो ।कार्यक्रममा लिम्बु संस्कृतिमा आधारित् फिल्म भएकाले कार्यक्रममा च्याब्रुङ नाचेर सुरु गरिएको थियो । फिल्म हेर्न धरान नगर प्रमुख , सुरक्षा निकाय , बिभिन्न संघ संस्थाका अध्यक्षहरुको बिशेष उपस्थिती रहेको थियो ।
यस्तै गरी टिम दमकको डिम्याक्स सिनेमाहलमा गएको थियो । डिम्याक्समा पनि हाउसफुल शो का साथ जारी प्रदर्शन भएको थियो । डिम्याक्स हलले जारी टिमलाई बक्स अफिस अगाडी स्वागत सम्मान कार्यक्रम आयोजना गरेको थियो । जहाँ निर्माण टिमलाई फुलको बुकी मायाको चिनो दिएर स्वागत गरेका थिए । टिमलाई बिर्तामोड स्थित QFX ले भव्य स्वागत गरेको थियो । QFX ले वान स्टप मलको प्रबेशद्वार देखिनै स्वागतको होर्डिङ बोर्डहरु राखेर स्वागत सम्मान गरेको थियो ।
धरानमा जस्तै च्याब्रुङ नाच संगै टिमलाई हल प्रबेश गराइ हल भित्र दर्शकहरुलाई धन्यवाद कार्यक्रम राखिएको थियो । उक्त दिन QFX ले स्थानिय जनप्रतिनिधी , व्यापारी , बिभिन्न संघ संस्थाका पदाधिकारीहरु गरी जम्मा १०० जनालाई बिशेष VIP पासमा फिल्म हेराएको थियो । पुर्वमै छायांकन गरिएको पुर्वको लिम्बु समुदायको कथामा बनेको फिल्मले दर्शकहरुको अत्यधिक माया पाएकोले आफुहरु दर्शकहरुलाई हलमा भेटेर धन्यवाद दिन पुर्व आएको कार्यकारी निर्माता मणिराम पोखरेलले जानकारी दिए । पोखरेलले पुर्वकै हलहरुमा ५१ औ दिन मनाउने चाहना भएकोले अझै पनि पुर्वेली दर्शकहरुले साथको जरुरत रहेको र दर्शकले साथ दिनेमा आफु ढुक्क रहेको बताए ।
