वडा नम्बर ६ द्वारा आमाहरुलाई सम्मान

धरान उपमहानगरपालिका वडा नम्बर ६ द्वारा आमाको मुख हेर्ने दिनको अवसरमा आयोजित कार्यक्रममा वडाभरीका ८० बर्ष भन्दा माथीका ४५ जना वृद्ध आमाहरुलाई सम्मान गरिएकोछ । बुधवार वडाकै प्राङगणमा रहेको हलमा आयोजित कार्यक्रममा वडा भरीका वृद्ध आमाहरुको बाक्लो उपस्थिती थियो । आमाहरुलाई दोसल्ला ओढाएर सम्मान गरिएको थियो भने उपस्थित सबै वृद्ध आमाहरुलाई लठ्ठी उपहार प्रदान गरिएको थियो । वृद्ध आमाहरुलाई बितरण गरिएको लठ्ठी भने स्थानिय राजकुमार राईले उपलब्ध गराएका थिए । राई लाई पनि सम्मान पत्र र दोसल्ला ओढाएर सम्मान गरिएको थियो । वृद्ध आमाहरुलाई कार्यक्रमका प्रमुख अतिथी तथा वडा नम्बर ६ का वडाध्यक्ष भुपेन्द्र भट्टराई , कार्यक्रमकी सभापती वडासदस्य यसोदा सुवेदी , वडा सदस्य राजेन्द्र न्यौपाने र सदस्य नारायण निरौलाले सम्मान गरेका थिए ।

कार्यक्रमका प्रमुख अतिथी वडाध्यक्ष भुपेन्द्र भट्टराई ले सबै जेष्ठ नागरिकको पहिलो छोराछोरी नै वडा भएको बताए । अहिलेको समय वडा भनेको सबैको आसाको केन्द्रबिन्दु अभिभावक भएकोले अबको दिन हरेक जेष्ठ नागरिकको पहिलो आसा वडा कार्यालय हुने बताए । पछिल्लो समय छोरा छोरीहरु सम्पतीमुखी हुँदै गएकाले आफ्नो जिउनी या आफु सँग भएको सम्पती छोराछोरीको अगाडी हत्त्पत्त नखोल्न सुझाब समेत दिए । आमा बुवाको हेरचाह गर्न नि कर्ममा लिएर आउनु पर्ने रहेछ भनेर भावुक बनेका अध्यक्षले जेष्ठ नागरिक आमाबुवाको सम्मन गर्न आग्रह गरे । वडा कार्यलय जेष्ठ नागरिकहरुको आफ्नै घर भएकाले आफ्नो कुरा निर्धक्क राख्न आग्रह गरे । कार्यक्रममा उपस्थित हुन नसकेका आमाहरुलाई घरमै गएर सम्मान गरे भट्टराईले बताए ।

कार्यक्रममा वडा सदस्य राजेन्द्र न्यौपानेले आफ्नो छोराछोरीहरु टाढा भएका आमाहरुलाई एक्लोपन महसुस नहोस भन्ने उद्देश्यले कार्यक्रम आयोजना गरिएको बताए । वडाका सबै जेष्ठ नागरिकहरुको साहारा वडा भएकोले आफ्नो छोरा छोरी सम्झेर सल्लाह दिन आग्रह गरे । कायक्रममा वडा सदस्य नारायण निरौला , यसोदा सुवेदी , यसैगरी स्थानिय नेत्री कोपिला भट्टराई लगायत उपस्थित अतिथिहरुले शुभकामना मन्तव्य राखेका थिए । कार्यक्रमलाई वडा सदस्य देवीमाया विश्वकर्माले संचालन गरेकी थिईन । सम्मान पछी जेष्ठ नागरिक सम्मानित आमाहरु र उपस्थित समुर्ण आमाहरुलाई मिठो खिर खुवाइएको थियो । खिर खाइसके पछी आमाहरु भजन किर्तनमा रमाउदै नाचेका थिए ।