गोर्खाल्याण्ड आन्दोलनलाई पाठ्यपुस्तकमा समेटनु पर्नेमा ‘बम बहादुर’ निर्देशकको जोड

यही पौष ५ गते डिसेम्बर २० बाट नेपाल र भारतमा एकसाथ प्रदर्शनमा आउन लागेको चलचित्र ‘बम बहादुर’ का लेखक तथा निर्देशक जोन राईले गोर्खाल्याण्ड आन्दोलनको ईतिहासलाई बिधालयको पाठ्यपुस्तकमा समेटिनु पर्नेमा जोड दिएका छन । आइतबार इटहरीमा आयोजित पत्रकार सम्मेलनमा उनले चलचित्रको बारेमा बताउदै, ‘बम बहादुर’ ले भारतको पश्चिम बंगाल राज्यको दार्जीलिङ, कालिम्पोङ, र सिलीगुडी क्षेत्रमा बसोबास गर्ने नेपालीभाषी भारतीयहरुद्वारा छुट्टै प्रदेश गोर्खाल्याण्डको माग गर्दै सन १९८० को दशकमा सुरुगरिएको गोर्खा आन्दोलनलाई मुख्य बिषय बनाएर निर्माण गरिएको हुनाले गोर्खाल्याण्ड आन्दोलन चलचित्रमा मात्र नभएर अब दैनिक अध्ययन गर्ने बिधालयको पाठ्यपुस्तकमा समेटिनु पर्नेमा जोड दिएका हुन ।

चलचित्र ‘बम बहादुर’ ले गोर्खाल्याण्ड आन्दोलन सहि थियो अब फेरी यस्तै हिंसात्मक आन्दोलन गर्नु पर्छ भन्ने चलचित्रको उद्देश्यहो भन्ने संचारकर्मीको जिज्ञासामा उनले, चलचित्र निर्माण गर्नुको उद्देश्य भनेको अब त्यस्तै प्रकारको आन्दोलन नहोस, आन्दोलन गर्नै परे, हिंसात्मक हैन तर शान्तीपूर्ण तरिकाले खुकुरी र बन्दुकले होइन दिमागले आन्दोलन गरौँ भन्ने, सन्देश दिन खोजेको बताए ।

पत्रकार सम्मेलनमा चलचित्रका सम्पूर्ण टिम, मुख्य कलाकार सौगात मल्ल, चलचित्रकी प्रमुख अभिनेत्री अनिशा रसाइली,शान्तिला तामाङ निर्माता , लगायत कलाकारहरुको उपस्थिती थियो । चलचित्रका मुख्य अभिनेता सौगात मल्लले यो चलचित्रको कथा आफ्नै जस्तो लागेको र यसले दर्शकको मन जित्ने विश्वास व्यक्त गरे । ‘बम बहादुर’मा दर्शकले आफ्नै कथा देख्ने अपेक्षा गरे । “मलाई विश्वास गरी यो पात्रको लागि मलाई छनोट गर्नुभएकोमा निर्देशक निर्मातालाई धन्यवाद छ । स्क्रिप्ट पढ्दा मलाई आफ्नै कथा जस्तो महसुस भएको थियो । म निकै भावुक भएको थिएँ र तुरुन्तै मैले यो कथामा काम गर्छु भनेर सोच्न खासै समय लगाइन । नेपालमा बस्ने जतिले पनि यो चलचित्र हेर्नु हुन्छ यो कथा आफ्नै हो जस्तो लाग्छ भन्ने लाग्छ,” मल्लले बताए ।

चलचित्रकी प्रमुख अभिनेत्री अनिशा रसाइलीले यो चलचित्रले हामी सबैको एउटै कथा हो भन्ने पक्षलाई उजागर गर्ने बताइन् । आफु सिक्किमको भएकोले त्यति धेरै आइडिया नभए पनि आफु फिल्म सुट गर्न जादा लोकेसनमा पुरानो समयमा समस्या भोग्नु भएकाहरूको कुरा सुन्दा डरलाग्दो थियो । सत्य घटना भएकोले पनि सम्पूर्ण नेपाली भासी दर्शकहरुले हेर्नै पर्ने चलचित्र बनेको उनको विश्वाश छ ।

जोन राई र रुपेश तामाङको कथा र पटकथा रहेको यस चलचित्रको निर्माता सञ्जीव सार्की हुन । यही पुष ५ गते नेपाल र भारतमा एकसाथ प्रदर्शन हुने तय गरिएको चलचित्रले भारतका नेपाली समुदायले भोगेको सङ्घर्षको इतिहासको डिजिटल दस्ताबेजको रूपमा परिभाषित गर्ने निर्देशक राई ले जानकारी दिए । चलचित्रको मुख्य सल्लाहकार चर्चित अभिनेत तथा निर्माता श्रवण घिमिरे हुन ।