भोजपुरको एक गाउका पोखरेल र राईको प्रेम कथा ‘सोल्टीनी’ निर्माण घोषणा

तराइको कथालाई लिएर एक्सन चलचित्र ‘रङ्गेली’ निर्देशन गरेका अर्जुन सुवेदीले अब पहाडी जिल्ला भोजपुरको एक गाउको कथा लाई लिएर चलचित्र ‘सोल्टिनी’ निर्देशन गर्ने भएका छन । चलचित्र पूजार सार्की बाट उदाएकी परिक्षा लिम्बु र चर्चित गायक तथा कलाकार प्रकाश सपुतको मुख्य भूमिका रहने ‘सोल्टीनी’ ले भोजपुरको एक गाउको पोखरेल थरका भिमसेन पोखरेल(प्रकाश सपुत ) र राई थरकी दिलाशा राई ( परिक्षा लिम्बु) बिचको अन्तरजातीय प्रेम कथालाई पर्दा उतार्ने तयारी भएको सोमबार सार्वजनिक गरिएको परिचयात्मक भिडियोले प्रस्ट पारेको छ ।

जातीय भेदभाव र अपुरो प्रेमको संवेदनशील कथा उठान गरिने चलचित्रमा चर्चित कथा वाचक साइग्रेस पोखरेलको मार्मिक कथा वाचनले चलचित्रको भाव व्यक्त गरेको छ । वाचनमा उनले भनेका छन्, “मानिसबाट मानिसलाई हुने छि छि दुरदुर, अमानवता र जातीय भेदभाव मेटाउन कसैले त कलम अगाडि बढाउनै पर्छ, कि त पैताला जलाउनै पर्छ ।” यसबाट चलचित्रले समाजमा विद्यमान अमानवीयता र जातीय भेदभावलाई उजागर गर्दै यस विरुद्ध आवाज उठाउने कथा प्रस्तुत गर्ने सङ्केत गरेको छ ।

सार्वजनिक भिडियोमा प्रकाश सपुत र परीक्षा लिम्बुलाई प्रमुख भूमिकामा प्रस्तुत गरिएको छ । सपुतले ‘भीमसेन पोखरेल’ को भूमिका निर्वाह गर्दै भनेका छन्, “सोल्टिनी आयौ, अन्तिम पटक भेट्ने मौका दियौ । तिम्रो अनुहार हेर्न नपाई डोली चढ्छौ जस्तो लागेको थियो ।” यो संवादले धेरै दर्शकहरुको ध्यान खिच्ने प्रस्ट छ । यसै गरी प्रकाशकै जोडी अर्थात अभिनेत्री लिम्बुले ‘दिलासा राई’ को भूमिका निभाउँदै बोलेको संवाद “सोल्टी, म तपाईँलाई एकदमै माया गर्छु, यति धेरै की तपाईँले सोच्न पनि सक्नुहुन्न । तर हामी एक हुन सक्दैनौँ ।

”यी संवादले यस चलचित्रमा अपुरो प्रेमको गहिरो कथा रहेको अनुमान गर्न सकिन्छ ।चलचित्र निर्माण घोषणासँगै रिलिज मिति पनि २०८२ सालको असोज ३ गते संविधान दिवसको दिनलाई तोकिएको चलचित्रलाई प्लानेट थ्री फिल्म्सको प्रस्तुति तथा नेपसिनेको र योलो इन्टरटेन्मेन्टको सहकार्यमा बन्न लागेको यो चलचित्रले पुस १५ बाट छायाङ्कन सुरु गर्ने तयारी गरेको छ । हाल चलचित्रका कलाकार र प्राविधिक टोलीको वर्कसप चलिरहेको छ ।