किरात राई यायोक्खाको ३६ औं स्थापना दिवशको अवसरमा धरानमा भएको रक्तदान कार्यक्रममा २७ पिन्ट रगत संकलन भएकोछ ।
किरात राई यायोक्खा सुनसरीको आयोजना रेडक्रस सुनसरीको प्राविधिक सहयोगमा धरान १० स्थित किराया यलम्बर स्मृति संग्राहलयको सभाहलमा गरिएको रक्तदान कार्यक्रममा २७ पिन्ट रगत संकलन भएको किराया सुनसरीका कोषाध्यक्ष उपेन्द्र चाम्लिङले जानकारी दिए । उनले डेंगु महामारीका कारण रक्तदाताहरुले रगत दिन नपाउँदा सोचे अनुरुप रगत संकलन नभएको पनि बताए ।
यायोक्खामा योगदान पुब्याउने चार जना सम्मानित
कार्यक्रममा किरायाको वडामा रहेर लामो समय नेतृत्व योगदान पुर्याउने चार जनालाई ’जिवन्त यायोक्खा सम्मान’ बाट सम्मानित गरिएको थियो । सम्मानित हुनेहरुमा किराया धरान १८ का पूर्वअध्यक्ष बिर्ख बहादुर राई, किराया धरान १७ का अध्यक्ष बलराम राई, किराया धरान १९ का अध्यक्ष मेघनाथ राई र किराया धरान ८ का अध्यक्ष निरबहादुर राई रहेका छन् । उनीहरुलाई कार्यक्रमका प्रमुख अतिथी धरान उपमहानगरपालिकाका निवर्तमान मेयर तथा किराया केन्द्रीय कार्यसमितिका पूर्वअध्यक्ष तिलक राई, किराया सुनसरी अध्यक्ष राजेन्द्र राईलगायतले किराती संस्कार अनुसार फेटा गुथेर सम्मान पत्रसहित सम्मानित गरिएको थियो ।
डेंगु उपचारमा आवश्यक भए यायोक्खाले आफ्नो भवन उपलब्ध गराउनेः किराया सुनसरी अध्यक्ष राजेन्द्र राई
कार्यक्रममा किराया सुनसरीका अध्यक्ष राजेन्द्र राईले डेंगु रोगका कारण अहिले धरान आक्रान्त बनिरहेको बताए । उनले उपमहानगरपालिकालाई डेंगु उपचार केन्द्र बनाउन आवश्यक परेको खण्डमा यायोक्खाले आफ्नो भवनसहित विभिन्न वडामा रहेको भवन समेत निःशुल्क उपलव्ध गराउने बताए ।
“जिल्लाको आफ्नै भवन पनि छ, किरायाको विभिन्न वडाहरुमा आफ्नै भवन छ” अध्यक्ष राईले भने “वडा नंं. ८, १५, १९, १७, ५ र १३ मा किरायाको आफ्नै भवन छ, परिआएको खण्डमा डेंगु उपचार केन्द्रको निम्ति निःशुल्क उपलब्ध गराउँछौं ।”कार्यक्रममा प्रमुख अतिथी राईले यायोक्खामा युवाहरुको आकर्षण हुन नसकेको बताए । उनले यायोक्खाको वडा तहमा युवाहरुलाई नेतृत्वमा ल्याउन ठोस योजना बनाएर यायोक्खा लाग्नुपर्ने समेत सुझाब दिए । कार्यक्रममा धरान ८ वडाध्यक्ष धन बहादुर राई, आदिवासी जनजाती समन्वय परिषद सुनसरी अध्यक्ष राम मान्डुपा राई, किराया सुनसरीका सल्लाहकार पूर्वगार्खा मेजर डिबी साम्पाङ राईलगायतले बोलेका थिए ।
सुनसरीको धरान १५ बाट बिपी फोर इन्टरटेन्मेन्ट प्रा.लि.द्वारा सञ्चालित यस हंगामा खबर ले बिशेषगरी चलचित्र,मनोरंजन, स्थानिय समसामयिक बिषयका खोजमुलक समाचार र अन्तरवार्ता प्राथमिकता दिनेछ ।