कोशी प्रदेशमा चलचित्र बिकासको लागी बजेट शुन्य ?

आफुलाई चलचित्रप्रेमी भन्न रुचाउने कोशी प्रदेशका मुख्यमन्त्री हिक्मत कुमार कार्कीले प्रदेशमा चलचित्र बिकासको लागी कुनै बजेट छुट्याएनन । कोशी प्रदेश आर्थिक अध्यादेश २०८० र कोशी प्रदेश विनियोजन अध्यादेश २०८० जारी गरिएको छ । आर्थिक मामिला तथा योजना मन्त्रालयको जिम्मेवारीसमेत सम्हालेका मुख्यमन्त्री हिक्मत कार्कीले बजेट प्रस्तुत गरेका हुन । आर्थिक वर्ष २०८०/८१ का लागि ३६ अर्ब २४ करोड ३५ लाख रुपैयाँको बजेट सार्वजनिक गरेको हो । जसमा चालु खर्चमा १४ अर्ब ३९ करोड ६२ लाख ६६ हजार, पुँजीगततर्फ १८ अर्ब २३ करोड ४२ लाख ५२ हजार र वित्तीय हस्तान्तरणतर्फ एक करोड र पालिका वित्तीय हस्तान्तरणमा तीन अर्ब ६० करोड २९ लाख ९२ हजार रुपैयाँ बजेट विनियोजन गरिएको छ ।सबैभन्दा धेरै भौतिक पूर्वाधारतर्फ ११ अर्ब ४१ करोड रुपैयाँ बजेट विनियोजन भएको छ तर चलचित्र पर्यटन बिकासको लागी भने बजेट शुन्य रहेकोछ ।

हरेक जसो कायक्रममा कोशी प्रदेशमा चलचित्र बिकासका लागी आफुले सक्दो भूमिका खेल्ने बताउदै आएका मुख्यमन्त्री कार्कीले यस बर्षको बजेटमार्फत चलचित्र बिकासमा भने केही सम्बोधन गरेनन । कार्की शेरधन राई मुख्यमन्त्री हुँदा आन्तरिक मामिला तथा कानुन मन्त्री थिए । सोही बखत प्रदेशमा चलचित्र महोत्सव गर्ने तयारी गरेपनी स्थानिय चुनावका कारण स्थगित भएको थियो । सोही समय प्रदेश मा फिल्म स्टुडियो निर्माण गर्ने भनेर सुनसरी र उदयपुरको सिमाना श्रीलंका टापुको सर्वे गरी प्रतिवेदन बुझाईएको थियो । चलचित्र बिकास बोर्डका तत्कालिन अध्यक्ष दयाराम दाहालको संयोजकत्वमा स्थानिय कलाकारहरु सहितको समितिले सम्भावित प्रतिवेदन बुझाएको थियो । प्रदेशमा चलचित्र पर्यटनको सपना देखेको सरकारले यस आर्थिक बर्षको बजेटमा कुनै पनि चलचित्र गतिविधीको लागी समेटेन । तर सरकारले पर्यटन क्षेत्रमा चर्चित कलाकारहरुलाई पर्यटन सदभावना दुतको रुपमा लिने निर्णय गरेकोछ । चलचित्र पर्यटनको लागी सम्भावित अध्ययन गरिने भनी उल्लेख नभएपनी चलचित्र पर्यटनलाई प्राथमिकतामा राखी बिभिन्न गतिविधी गरिने भनी बजेटमा उल्लेख गरिएकोछ ।