स्कुलबाट फर्किदै गरेका बालकलाई धरानको ड्रेनमा आएको बाढीले बगाएर मृत्यु

बिहीवार साझ धरानमा परेको भारी बर्षाका कारण धरान १७ को ड्रेनमा आएको बाढीका कारण १४ बर्षीय बालक रोशन लिम्बूलाई बगाउदा उनको मृत्‍यु भएको छ । धरान ११ को भिक्टोरिया स्कुलमा कक्षा ९ मा अध्ययनरत बालक घर फर्कँदै गर्दा ड्रेनको भेल बाढीले बगाएर उनको मृत्‍यु भएको धरान १७ का वडा सदस्य मनिष विष्टले जानकारी दिए ।

बाढीले बगाएका बालकको शव धरान-१७ स्थित फोक्लेन टापुको ठकुरी खोला पुलबाट एक सय मिटर उत्तरतर्फ फेला परेको धरान-१७ का वडाध्यक्ष सूर्यबहादुर भट्टराई (मनोज) ले टेलिफोनमा जानकारी दिए । भारी वर्षाका कारण धरान उपमहानगरपालिका छेउमा रहेको खहरे खोलामा पानीको बहाव बढी भएका कारण उपमहानगरपालिका गेट अगाडीको सडक समेत भासिएको छ भने धरान-१३ का खहरे खोलाहरूमा पानीको बहाव बढी भएर सडकमा ढुङ्गा र गिट्टी थुपारेको छ ।