कोशी प्रदेशका मुख्यमन्त्री कार्कीले हेरे ‘जारी’

कोशी प्रदेशका मुख्यमन्त्री हिक्मत कुमार कार्कीले अहिले सफलताका साथ प्रदर्शन भैरहेको चलचित्र जारी हेरेका छन । उनले सोमबार आफ्नो सामाजिक सन्जाल फेसबुकमा पोस्ट गर्दै आफुले प्रदर्शनरत चलचित्र जारी हेरेको जानकारी दिएका छन ।मुख्यमन्त्री कार्कीले जारी कहाँ कुन हलमा हेरेको भन्ने बारे नखुलाएपनी फिल्म हेरिसके पछी आफुलाई लागेको कुरा लेखेकाछन । उनका पोस्ट अनुसार ‘जारी’को टिजर आएदेखिनै फिल्म हेर्न आतुर भएको र समय मिलाएर आफुले फिल्म हेरेको उल्लेख गरेकाछन ।

जारी प्रथाको सेरोफेरोमा लिम्बू सम्स्कृती र परम्परा लाई उजागर गरेको चलचित्र हो “जारी”। लिम्बु समुदायको पालम गीतमा आधारित रहेर फरक शैलीमा बनाइएको “जारी” चलचित्रको टिजरले चलचित्र हेरौं हेरौं जस्तो त लागेकै थियो। आज हेर्ने मौका मिल्यो। कोशी प्रदेशको महत्वपूर्ण संस्कृति र पहिचानमा अधारीत यस चलचित्रले पूरा अवधीभर कहिले हँसाउँने, कहिले रुवाउँने, कहिले काउँकुति लगाउँने, कहिले जिरिङ्ग पारेको अनुभुति भयो। मिठो स्थानीय लवज, चोटिला संवाद, रोचक घटनाक्रमहरूका कारण चलचित्रले झर्राे नेपालीपन झल्काएको पाए। नेपाली मौलिक सांस्कृतिक र परम्पराका विभिन्न पक्षहरु लाई उजागर गर्ने उदेश्यले निर्माण गरिएको “जारी” चलचित्रका निर्देशक तथा लेखक उपेन्द्र सुब्बा, निर्माता रामबाबु गुरुङ, कलाकार दयाहाङ राई ,मिरुना मगर, बिजय बराल, कमलमणी नेपाल लगायत सम्पुर्ण कलाकारहरु लाई पहिले त हार्दिक धन्यवाद एवम हार्दिक बधाई। चलचित्रको पुर्ण सफलताको शुभकामना व्यक्त गर्दछु। उनले पोस्ट गरेकाछन ।

बासुरी फिल्म्स ब्यानरमा कबड्डी फेम्ड निर्देशक राम बाबु गुरुङले निर्माण गरेको ‘जारी’ मा उपेन्द्र सुब्बाको लेखन तथा निर्देशन रहेको छ । ‘जारी’ मा दयाहाङ र मिरुनासँगै विजय बराल, प्रेम सुब्बा , मनिता जैका बान्तवा , रोयदीप श्रेष्ठ, रेखा लिम्बु, कमलमणी नेपाल, पुष्कर गुरुङलगायत कलाकारको अभिनय छ। चलचित्र यही बैशाख १ गते देसभर र देशबहिरका सिनेमाहलहरुमा भव्यताका साथ प्रदर्शन भैरहेकोछ ।