अन्तराष्ट्रिय आमन्त्रण बुढासुब्बा गोल्डकप फुटबल प्रतियोगिताले २५ औं संस्करण पुरा गर्दै

मोफसलकै सबैभन्दा पुरानो अनी प्रतिष्ठित गोल्ड कप, अन्तराष्ट्रिय आमन्त्रण बुढासुब्बा गोल्डकप फुटबल प्रतियोगिताले यस वर्ष २५ औं संस्करण पुरा गर्दै रजत उत्सव मनाउदै छ । माघ १९ गतेबाट संचालन हुने प्रतियोगीताको २५ औ संस्करणको साक्षी बन्न धरान रङ्गशालामा भोली माघ १९ गते शनिबार हजारौ दर्शक तथा सयौ अतिथिहरु उपस्थित हुँदैछन । 

धरानले भोली फुटबलको उत्सव मनाउदै छ । नेपालमा हुने वार्षिक अन्तर्राष्ट्रिय क्लब स्तरको नकआउट फुटबल प्रतियोगीताहरु मध्ये पुरानो अनी सबैभन्दा उत्कृष्ट मानिएको बुढासुब्बा गोल्डकप को २५ औ संस्करणको उद्घाटन खेलमा चर्च ब्वाइज युनाइटेड क्लब काठमाडौ र नेपाल पुलिस क्लब खेल्दैछन् ।

प्रतियोगितामा भुटानको आरटीसी फुटबल क्लब र भारतको युकेएफसी सहित ८ टिमले सहभागिता जनाउनेछन् । प्रतियोगितामा ए डिभिजनका चर्च ब्वाईज क्लब, नेपाल पुलिस क्लब र एनआरटी क्लबले सहभागिता जनाउनेछन् भने आयोजक धरान फुटबल क्लब, राजा क्लब इटहरी र काकडभिट्टा फुटबल ट्रेनिङ सेन्टरले समेतको सहभागी हुने धरान फुटबल क्लबका अध्यक्ष प्रताप तामाङले जानकारी दिएका छन् । उद्घाटन समारोहमा विद्यालयहरुको मार्च पास, ८० जनाको समुहको विशेष नृत्य र ५ पाउण्डको केक काट्ने कार्यक्रम रहेको अध्यक्ष तामाङले जानकारी दिए । चर्च माघ १९ गतेदेखि २६ गतेसम्म धरान रंगशालामा प्रतियोगिता चल्नेछ ।