‘खजुरे ब्रो’ मा कलाकारको खोजी, धरानमा अडिशन हुने

धरानकै सेरोफेरोको कथालाई आधार मानेर निर्माण गर्न लागेको ‘खजुरे ब्रो’ को लागी दुइजना मुख्य कलाकारहरुको खोजी भएको छ । बिशेषगरी मंगोलियन विशेषताहरू भएको धराने वा पुर्बेली लवज भएका कलाकारहरुको खोजी भएको निर्माण टिमले जनाएकोछ । ‘खजुरी ब्रो’ का लागी धरानमा छनोट गरिने कलाकारहरु फिल्मका लागी मुख्य कलाकार हुने कार्यकारी निर्माता डाइमण्ड उप्रेतीले जानकारी दिए । उनका अनुसार कलाकारहरुको छनोट अडिशन मार्फत हुनेछ । अडिशन यही पौष ९ गतेदेखी धरानमा अडिशन हुने निर्माता उप्रेतीले जानकारी दिए । ‘खजुरे ब्रो’ एक हास्य व्यंग्य किसिमको फिल्म बन्ने निर्माता उप्रेतीको भनाइ छ । खजुरे ब्रो हल्का पारिवारिक कमेडी फिल्म हो , पैसाको लोभमा परेका युवायुवतीको कथा हो । सबै पात्रहरू पैसाको पछी लागेपछी आउने उत्तरचढाव फिल्मले बोल्नेछ । लाहुरेको शहर धरानको कथामा निर्माण हुने फिल्मले पूर्व गोर्खा ब्रिटिश आर्मी पिताले हुर्काएको छोरी गलत केटाको लागि पछी लाग्दा आउने कथा ‘खजुरे ब्रो’ ले बोल्नेछ ।

८ बर्ष अघि सिनेमा ‘षडङ्ग’को निर्देशन गरेका निर्देशक सुरज सुनुवारले ‘खजुरे ब्रो’ निर्देशन गर्ने भएकाछन । फिल्मको शुक्रबार औपचारिक घोषणा गरिएको छ । फिल्म निर्माण टिमले बंगलामुखी मन्दिर पुगेर शुभसाइतसँगै निर्माण घोषणा गरेको हो । ‘खजुरे ब्रो’ को लेखक पनि निर्देशक सुनुवार नै हुन । दिव्य दृश्य इन्टरटेन्टमेन्टको ब्यानरमा निर्माण हुने सिनेमा कमेडी जनरामा आधारित रहने बताइएको छ । नबीन मानन्धर र सुरज सुनुवारले निर्माण गर्ने सिनेमाका कार्यकारी निर्माता डायमण्ड उप्रेती हुन् ।शिशिर बिशंखेले छायांकन गर्ने सिनेमा माघ पहिलो साताबाट फ्लोरमा जानेछ ।

सिनेमाको छायांकन इटहरी, धरान, दार्जलिंग र काठमाडौंमा हुनेछ । ‘खजुरे ब्रो’को शीर्ष भूमिकामा अभिनेता महेश त्रिपाठी अनुबन्धित भएका छन् । निर्माता र उनीबीच बुधबार लिखित सहमति भएको जनाइएको छ । यसबाहेक फिल्ममा विल्सनविक्रम राईको समेत चर्चा छ । अहिलेको दर्शकहरुको चाहना अनुसार पूर्ण मनोरञ्जन दिने उदेश्यका साथ सिनेमा निर्माण गर्न लागेको कलाकार तथा निर्माता नबीन मानन्धरले बताए । सिनेमामा अनमोल गुरुङको संगीत रहनेछ । प्रकाश भुजेल प्रोडक्सन म्यानेजर तथा प्रदीप भण्डारी लाइन प्रोडुसर रहेको हुनेछन ।