पछील्लो समय बालक , किशोर र युवाहरुलाई लतनै लागेको खेल पब्जी हो । पब्जीबाट धेरै साथीहरु बन्ने बनाउने कार्य धेरै भएकोछ । अनलाइनमा साथी बनाएर पब्जी खेल्ने साथीलाई भेट्न भारतको राजस्थान जाँदै गरेका झापा भद्रपुरका दुई बालकलाई भारतीय प्रहरीले उद्धार गरेको छ । भद्रपुर नगरपालिका १० काफ्ले टोल निवासी १३ वर्षीय बालक सौगात काफ्ले र ११ वर्षीय प्रयास दाहाललाई भारतीय प्रहरीले उद्धार गरेको हो । घरमा कसैलाई केही जानकारी नगराई एकाएक बेपत्ता भएका थिए । उनीहरू सोमबार दिउँसो २ बजे भद्रपुर–गलगलिया सीमा नाका हुँदै भारत गएका थिए । पश्चिम बंगलाको उत्तर दिनाजपुरस्थित ईटहार प्रहरीले मंगलबार उनीहरूलाई उद्धार गरी सुधार गृह चाइल्ड लाइनलाई जिम्मा लगाएका छन् । घटनाअनुसार बालकहरू सौगात र प्रयास गलगलिया रेलवे स्टेसन पुगेर सिलीगुड़ीतर्फ जाने राधिकापुर रेलमा चढे । उनीहरू भारत गएको घरमा कसैले थाहा नै पाएका थिएनन् । अबेर रातिसम्म उनीहरू घर नफर्किएपछि परिवारजनले उनीहरूको खोजी सुरु गरे । उनीहरूको तस्बिर सामाजिक सञ्जालमा हालेर भाइरल नै बनाए । परिवारजनले बालक हराएको भन्दै भद्रपुर र गलगलिया प्रहरीलाई समेत जानकारी गराए । मंगलबार बिहान इटाहारको सडकमा दुई बालक घुमिरहेको भारतीय प्रहरीले देखेपछि उनीहरूलाई उद्धार गरी प्रहरी कार्यालय लगेका थिए ।
