‘होस्टेल -३’ को ट्रेलरमा युवाहरुको अध्ययन , मित्रता, रोमान्स र बियोगको पिडा

सफल चलचित्र ‘होस्टेल’ को तेस्रो सिक्वेल चलचित्र ‘होस्टेल -३’को ट्रेलर रिलिज भएको छ । ठुलो पर्दाका लागी फ्रेश कलाकारहरुलाई डेव्यु गराएर निर्माण गरिएको चलचित्र ‘होस्टेल -३’ को ट्रेलर शुक्रवार काठमाडौं एक कार्यक्रम आयोजना गरी सार्वजनिक गरिएको छ । ट्रेलर सार्वजनिक कार्यक्रममा चलचित्रका मुख्य कलाकारहरु सबै को उपस्थिती रहेको थियो । सार्वजनिक भएको ट्रेलरमा ‘होस्टेल’ को पहिलो सिक्वेलकै झल्को छ ।कथा उही एक कलेज विभिन्न भुगोल र समुदायका बिधार्थीहरुको जमघट अनी मित्रता प्रेम रोमान्स अनी बियोग । झट्ट हेर्दा केही फरक लाग्छ जस्तो लागेपनी कथा र चलचित्रको जनरा उहि छ तर ट्रेलर हेर्दा गज्जब लाग्छ ।

कथा उही कलेज जीवनका सङ्घर्ष, मित्रता, र रमाइलो क्षणहरू । तर कथा उही लागे पनि लेखक तथा निर्देशक सशान कँडेलले अहिलेको समयको युवाहरुको दैनिकीलाई गज्जबले प्रस्तुत गरेकाछन ।सम्मान इन्टरटेनमेन्ट र आरोन कन फिल्म प्रा.लि.को संयुक्त ब्यानरमा निर्माण भएको यो चलचित्र आगामी फागुन २३ गतेबाट प्रदर्शनमा आउँदैछ । चलचित्र सम्मान इन्टरटेनमेन्टले आरोन कन फिल्म्ससँगको सहकार्यमा निर्माण गरेको हो । निर्माताहरू सुरेश कँडेल, कर्ण कार्की र गोविन्द अधिकारी तथा कार्यकारी निर्माता शङ्कर कोइराला हुन् । सह निर्माताहरू शिशिर ज्ञवाली, कुन्दन गुप्ता र अनीश सिग्देल तथा लाइन प्रोड्युसर कोसिसराज क्षेत्री हुन् ।

अर्जुन तिवारी डिओपी, बुद्ध थापा र मनोज खत्री सिनेमाटोग्राफर, सुदिप कुँवर मुख्य सहायक निर्देशक, यम प्रसाद ओली प्रोडक्सन डिजाइनर हुन् । चलचित्रका सङ्गीतकारहरू अर्जुन पोखरेल, अलमोडा राणा उप्रेती, महेश ज्ञवाली र किरण माइकल हुन्, जसमा विकास दाहालको सम्पादन, प्रवीण सिंह र रोशन विश्वकर्माको कोरियोग्राफी, हिमाल केसीको द्वन्द्व निर्देशन, राकेश दाहालको पोस्टर डिजाइन रहेको छ ।

पारस बम ठकुरी, सिम्रन पन्त, आशिष घिमिरे, पदम तामाङ, हेना नगरकोटी, रिहान गिरी, समा पराजुली लगायतका मुख्य पात्रको जीवनका झलक देख्न सकिन्छ । अभिनेता प्रवीण खतिवडा वार्डेनको भूमिकामा छन् भने आशिष पुरुष, रोहन श्रेष्ठ, उमर खान र सन्तोष बानियाँ खलनायकको भूमिकामा प्रस्तुत भएका छन् । ठुलो ज्यान, बडी मसल, लामो कपाल, डरलाग्दो अनुहारलाई मात्र खलनायक मान्ने प्रचलनलाई तोड्दै निर्देशक कडेल चलचित्र उही उमेर समुहका खलनायकलाई प्रस्तुत गर्दा बडो गज्जब लाग्छ । यही चलचित्रबाट मुख्य कलाकारहरुले डेब्यु गरेकाछन । ‘होस्टेल’को अघिल्लो शृङ्खलाबाट अनमोल केसी, सलोन बस्नेत, स्वस्तिमा खड्का, नाजिर हुसेन लगायत दर्जनौँ कलाकार उदाएका थिए । अब, ‘होस्टेल ३’ले पनि नयाँ कलाकारलाई स्थापित गर्ने सङ्केत गरेको छ ।

चलचित्रको निर्देशन सशान कँडेलले गरेका छन्, जो दुई दशकदेखि सङ्गीत तथा म्युजिक भिडियो निर्देशनमा सक्रिय छन् । माधव शर्माले लेखन तथा एसोसियट निर्देशनको जिम्मेवारी सम्हालेका छन् । चलचित्रको वितरण काठमाडौं उपत्यकामा काफिया फिल्म्स (गोविन्द शाही) र उपत्यका बाहिर आरआर फिल्म्स (रोहित कट्टेल, रत्न श्रेष्ठ) ले गर्नेछन् ।युवा पुस्ताको वर्तमान र अघिल्लो पुस्ताको विगतलाई स्मरण गराउन सफल ट्रेलरबाट ‘होस्टेल ३’ले अघिल्ला सिरिजको जस्तै युवा पुस्तालाई आकर्षित गर्ने अपेक्षा गर्न सकिन्छ ।ट्रेलरमा आकर्षक दृश्य, रोमाञ्चक कथा र युवा उमङ्ग झल्काउने विभिन्न दृश्यले दर्शकमाझ प्रतीक्षा बढाएको छ ।