रिल फिल्मको जमानाको सम्झना, ‘ महापुरुष’ ले मनायो ५१ औ दिन

गत कार्तिक ११ गतेबाट प्रदर्शनमा आएको चलचित्र महापुरुष’ ले शनिवार ५१ औ दिन मनाएकोछ । रिलमा फिल्म खिच्ने जमनामा हिट फिल्म मानिएका फिल्म हरुले ५१ औ दिन मनाउने गर्थे । तर पछील्लो समय फिल्म डिजिटलाईज भए सङ्गै ५१ औ दिन मनाउन एकादेशको कथा जस्तै भएको थियो । महापुरुष’ ले भने रेकर्ड तोड्दै शनिबारबाट प्रदर्शनको ५१ औ दिनमा प्रबेश गरेको हो । प्रदर्शनको तीन हप्ता आक्रामक व्यापार गरेको फिल्मलाई हिट मानिरहेको अवस्थामा महापुरुष’ले गज्जबको ब्यापार गर्दै मल्टीप्लेक्सहरु क्यूएफएक्स चेन, एफक्यूब, वान सिनेमाज्, बिग मुभिज, आइएनआई सिनेमाज्, पोखरा सिनेप्लेक्ससहित काठमाडौं र मोफसलका केही सिंगल थिएटरमा प्रदर्शनको ५१ दिन मनाएको हो । फिल्मले ५१ औ दिनको अवधिमा करिब ११ करोड कलेक्सन गरेको निर्माण टीमको दावी छ ।

फिल्ममा मदनकृष्ण श्रेष्ठ, हरिवंश आचार्य, गौरी मल्ल, राजाराम पौडेल, रवीन्द्रसिंह बानियाँ, शिरू विष्टसँगै नवप्रस्तुतिमा अरुण क्षेत्री र अञ्जना बराईली मुख्य भूमिकामा रहेका छन् । फिल्ममा एक्लोपनको कथा देखाइएको छ । आदर्शनगरमा बसोवास गर्ने अवकाशप्राप्त शिक्षकमार्फत पिता र एकल पुरुषसँगै एक्लोपन कथा फिल्ममा देखाइएको छ ।भविष्य निर्माण गर्न अलग भइसकेको छोरा, सपना बोकेर अस्ट्रेलिया जान लागेको छोरा र एक्लोपनमा रहेका शिक्षकमार्फत समाजको गम्भीर विषयलाई सरल रुपमा प्रस्तुत गरिएको छ । षट्कोण आर्ट्स प्रालिको व्यानारमा निर्मित फिल्मका निर्माता दिपेश खत्री रहेका छन् ।