‘महापुरुष’ को तेस्रो गीतमा गौरी र हरिबंशको प्रेम अंकुरायो

दोस्रो हप्तामा सफलताका साथ प्रदर्शन भैरहेको चलचित्र ‘महापुरुष’को तेस्रो गीत रिलिज भएकोछ । गीत केन्द्र मोशनको युट्युब च्यानल बाट रिलिज भएको हो । ‘पर्खाल’ ले झ्याल पायो बोलको गीतमा फिल्मका मुख्य कलाकार हरिबंश आचार्य र गौरी मल्ललाई रोमान्टिक मुडमा प्रस्तुत गरिएकोछ । हरिबंशको एक्लोपन भुलाउन उनकै छिमेकी राजाराम पौडेलले थियटर लगेपछी थियटरमा गौरीमल्ल सङ्गको भेट पछी बिस्तारै बदलिदै गएका हरिबंश र गौरी मल्ललाई रोमान्टिक देखाइएको छ । उमेर ढल्किएसङै अंकुराएको प्रेमबारे बोल्ने गीतमा नवराज पराजुलीको शब्द , कल्याण सिंहको संगीत र शान्तिम कोइरालाको आवाज रहेकोछ । ‘फिल्मको बारेमा दर्शकले नै राम्रो छ भनेपछि दोस्रो हप्तामा झनै दर्शक बढिरहेका छन् । हामी विभिन्न हलमा पुगेर भेटघाट गर्दैछौँ । आज उपत्यकामा फिल्म प्रदर्शन भइरहेको अधिकांश हलमा पुग्नेछौँ’, कार्यकारी निर्माता रवीन्द्र सिंह बानियाँले बताए ।

फिल्ममा मदनकृष्ण श्रेष्ठ, हरिवंश आचार्य, गौरी मल्ल, राजाराम पौडेल, रवीन्द्रसिंह बानियाँ, शिरू विष्टसँगै नवप्रस्तुतिमा अरुण क्षेत्री र अञ्जना बराईली मुख्य भूमिकामा रहेका छन् । फिल्ममा एक्लोपनको कथा देखाइएको छ । आदर्शनगरमा बसोवास गर्ने अवकाशप्राप्त शिक्षकमार्फत पिता र एकल पुरुषसँगै एक्लोपन कथा फिल्ममा देखाइएको छ ।भविष्य निर्माण गर्न अलग भइसकेको छोरा, सपना बोकेर अस्ट्रेलिया जान लागेको छोरा र एक्लोपनमा रहेका शिक्षकमार्फत समाजको गम्भीर विषयलाई सरल रुपमा प्रस्तुत गरिएको छ । षट्कोण आर्ट्स प्रालिको व्यानारमा निर्मित फिल्ममा कार्यकारी निर्माता रविन्द्रसिंह बानियाँ हुन् भने निर्माता दिपेश खत्री रहेका छन् ।