समलिङ्गी यौन चाहना भएकी आमाको कथा बोल्ने ‘मिरा’ को ट्रेलर रिलिज

आश्वि फिल्मसले यो सिनेमा निर्माण गरेको चलचित्र ‘मिरा’स्याडो अफ अ रेन्बो’को ट्रेलर सार्वजनिक गरिएको छ । सार्वजनिक ट्रेलरमा अटिजम भएकी छोरी र फरक यौन चाहना भएकी आमाको सङ्घर्षपूर्ण कथा देखाइएको छ। साथमा आध्यात्मिक चिन्तनलाई पनि ट्रेलरमा दर्साइएको छ ।एक बच्चामा देखिएको अटिजम (अन्तर्मुखी स्वभाव) र आफ्नो व्यक्तिगत सम्बन्धलाई समाजमा देखाउन खोज्ने एक आमाको सङ्घर्षपूर्ण कथामा सिनेमा बनेको सिनेमाकी प्रमुख अभिनेत्री तथा निर्देशक अनिता पण्डितले बताइन् । अनेकौँ आकाङ्क्षा बिच रुमलिएकी महिलाको जीवनको कथा, अटिजम र यौन शिक्षाको अभिमुखीकरणमा यो सिनेमाले अहम् भूमिका खेल्ने विश्वास अनिताको छ । केही दिनपछि केही लक्षित दर्शकहरूको लागि विशेष प्रिमियर शोहरूको आयोजना गर्ने तयारीमा रहेको उनले बताइन् । हल रिलिजको लागि पनि सिनेमा तयार रहेको बताउँदै अनिताले उपयुक्त मिति हेरी रिलिज गर्ने जनाइन् ।यस सिनेमामा अनिताको साथमा सुरविना कार्की, निशान चौहान, कैलाश रावल, रोशनी कार्की र बाल कलाकार आश्वि घिमिरेको प्रमुख अभिनय रहेको छ ।