‘शिवांश – च्याप्टर १’ को ट्रेलर सार्वजनिक, धार्मिक भेषमा अपराधको जालो फिजाएको कथा

यहि फागुन १ गतेबाट प्रदर्शनमा आउन लागेको चलचित्र ‘शिवांश – च्याप्टर १’ को ट्रेलर सार्वजनिक भएको छ । ट्रेलरमा धार्मिक वस्त्रका् खोल ओढेर अपराधको जालो फिजाएको कथा प्रस्तुत छ । सार्वजनिक ट्रेलरमा गेरु बस्त्र, निधारमा खरानी र हातमा त्रिशूल बोकेको मान्छे सधैं साधु नै हुन्छ भन्ने छैन, ऊ भित्र एउटा क्रुर अपराधी पनि लुकेको हुन्छ भन्ने यर्थाथ गज्जवले प्रस्तुत गरिएको छ । यही विरोधाभासपूर्ण कथा र पौराणिक रहस्य बोकेको चलचित्र ‘शिवांश – च्याप्टर १’ को मुख्य कथावस्तु भएको कुरा सार्वजनिक ट्रेलरले स्पष्ट देखाएको छ । । आगामी फागुन १ गते महाशिवरात्रिको अवसर पारेर प्रदर्शनको तयारीमा रहेको ‘शिवांश– च्याप्टर १’ ले नेपाली चलचित्रक्षेत्रमा विरलै बन्ने ‘स्पिरिचुअल एक्सन ड्रामा’ जनराको उठान गरेको छ भन्दा उपयुक्त हुन्छ ।

अञ्जन सिनेमा प्रोडक्शनको ब्यानरमा निर्माण भएको ‘शिवांश– च्याप्टर १’ ट्रेलरमा अभिनेता प्रविण खतिवडाको ‘लुक्स’ र अभिनय सबैभन्दा सशक्त पक्षको रूपमा देखिएको छ । बाहिरबाट हेर्दा सांसारिक मोह त्यागेको र सादगी जीवन बिताइरहेको जोगी देखिए पनि, भित्री रूपमा उनी कति क्रुर र खतरनाक हुन सक्छन् भन्ने कुरालाई ट्रेलरमा प्रष्ट देखाइएको छ ।

कुनै ‘दिव्य शक्ति’ वा ‘सिद्धि’ प्राप्तिको उन्मादमा रहेका पात्रको आवरणमा हत्या र हिंसाको कथा बुनिएको संकेत ट्रेलरले गर्छ । निर्देशक सन्तोष कुमार आत्रेयले फिल्ममा पौराणिक मान्यता र आधुनिक युगको रहस्यलाई एकै ठाउँमा मिसाउने साहसिक प्रयास गरेका छन् । कथामा पौराणिक ‘समुद्र मन्थन’ र त्यसबाट निस्किएको ‘विष’ को सन्दर्भ जोडिएको छ ।

एकातिर गुफा, मन्त्रोच्चारण र तान्त्रिक विधिहरू देखिन्छन् भने अर्कोतिर ल्यापटप, आधुनिक हतियार र पुलिसको अनुसन्धान देखाईएको छ । ट्रेलरमा देखाइएको ूयो पुस्तकले विध्वंश निम्त्याउन सक्छू भन्ने संवादले एउटा रहस्यमयी शिला र पुस्तकको वरिपरि ठूलो खतरा मडारिएको संकेत गर्छ । ट्रेलर हेर्दा फिल्मको क्यानभास भव्य देखिन्छ । यसलाई थप ओजपूर्ण बनाएको छ( भारतीय प्रख्यात गायक कैलाश खेरको जादुमयी स्वर र संगीतले ।

पृष्ठभूमिमा बज्ने मन्त्रोच्चारण र संगीतले दर्शकलाई आध्यात्मिक र थ्रिलर दुवै भावको महसुस गराउँछ । अञ्जान केसीको कथा र निर्माता रहेको यस चलचित्रको फिल्मको पटकथा बारत लिम्बूले लेखेका हुन् भने स्क्रिप्ट डक्टरको भूमिका सुलक्षण भारतीले निर्वाह गरेका छन् । फिल्ममा प्रवीण खतिवडा, विमला लिम्बू, रुषा न्यौपाने, तेज गिरी, विकास जोशी, उदय कुमार सुब्बा, सन्तोष कुमार आत्रेय, बारात लिम्बू, प्रदीप कुमार चौधरी, तुलसा लिम्बू, सबिर चुरौटे, टिका निरौला, कुन्दन चौधरी, सागर घिमिरे, रत्न लिङ्देन लगायतको अभिनय रहेको छ ।
फिल्ममा न्ह्यू बज्राचार्य र राजनराज शिवाकोटी संगीत रहेको छ भने गीतमा राजनराज, मिलन नेवार र समीक्षा अधिकारीको स्वर समावेश छ । सरद महतोले डीओपी, बनिश शाहले सम्पादन, मिलन श्रेष्ठले द्वन्द्व र विक्रम चोहानले यो फिल्ममा कोरियोग्राफी गरेका छन् ।