‘कुमारी’ को प्रचारप्रसार आक्रमक, ठुलो व्यानर धरानमा राखियो, ५ शहरमा कन्सर्ट गरिने

यहि माघ २३ गतेबाट प्रर्दशनमा आउन लागेको विशुद्ध प्रेमकथामा आधारित चलचित्र ‘कुमारी’ को प्रचार– प्रसार आक्रमक रुपमा अघि बढेको छ । चलचित्र ‘कुमारी’ निर्माण टिमले यतिबेला प्रचारको विभिन्न माध्यम अपनाएको छ । निर्माण टिमले आज धरान स्थित फ्रेण्डस् सिनेमाजको विल्डिङ नै ढाक्नेगरी ८० फिट अग्लो व्यानर झुण्डाएको छ । साथै निर्माण टिमले देशका मुख्य ५ शहरहरुमा कन्सर्ट पनि गर्ने घोषणा गर्दै ट्रेलरनै सार्वजनिक गरेको छ ।

निर्माण टिमका अनुसार माघ १ गते नेपालगन्ज, माघ ३ गते पोखरा, माघ ६ गते चितवन, माघ ९ गते काठमाडौं र माघ १७ गते दमकमा लाइभ कन्सर्ट आयोजना हुनेछ। काठमाडौंको कन्सर्टमै चलचित्र ‘कुमारी’को आधिकारिक ट्रेलर सार्वजनिक गरिने छ। ‘कुमारी लाइभ म्युजिकल कन्सर्ट विथ केहर एन्ड द लुङा’ नाम दिएको कन्सर्टमा चलचित्रका मुख्य कलाकारहरु सहित व्याण्डको मुख्य प्रस्तुती रहने छ ।

विशुद्ध प्रेम कथामा धेरै हिट चलचित्र निर्देशन गरेका चर्चित निर्देशक दिनेश राउतको निर्देशनमा विशुद्ध प्रेम कथानक नेपाली चलचित्र ‘कुमारी’ बाट अभिषेक खड्का र आकृति राजभण्डारीले प्रमुख भूमिकामा डेब्यु गर्दैछन ।उनीहरूसँगै घनश्याम जोशी, सुनिता श्रेष्ठ, आकाङ्क्षा कार्की, मधु खड्का, सनम श्रेष्ठ, सकु शाह, सरोज लामिछाने, मनीषा शर्मा र भूपी लुहार चलचित्रमा देखिनेछन्।चलचित्रको छायाङ्कन निर्देशन सुसन प्रजापतिले गरेका हुन्। निर्माण बिनिश इन्टरटेन्मेन्टले पिक्चर फ्रेमसँग सहकार्यमा गरेको हो भने निर्माता महेन्द्र अधिकारी हुन्। चलचित्रको स्क्रिप्ट विकास सुवेदीले लेखेका हुन्।