चौकीबारी साँझ -२०८१ मा धीरज राई देखी उर्जा व्याण्ड सम्मको प्रस्तुती रहने

अगामी फागुन १४ गते महाशिवरात्रीको अवसर पारेर चौकीबारी युवा समाज धरानले ‘चौकीबारी साँझ-२०८१’ आयोजना गर्ने भएको छ । सोमबार पत्रकार सम्मेलन गरेर आयोजकले साँझ बारे जानकारी दिएको हो । साँझमा नेपालका माइकल ज्याक्सनको उपनाम पाएका पप स्टार गायक धीरज राई , सोलो सिंगर धिरेन्द्र मालाकार, धरानका चर्चित ब्याण्ड उर्जा,पुरानो कुपी ब्याण्ड,बदमास ब्याण्ड, द एलाइज ब्याण्ड,हेटौँडाका र्यापर एमएसडी, स्थानीय र्यापरहरु वाजालुरे, गेन्जी फुजियोले प्रस्तुती दिने समाजका अध्यक्ष उत्तम तामाङले जनकारी दिए ।

खेलाडी र कलाकारहरूलाई प्रोत्साहन, ज्येष्ठ नागरिकहरूलाई अभिनन्दन’ भन्ने नाराका साथ आयोजना गर्न लागिएको साँझमा धरान १९ नम्बर वडाबाट प्रतिनिधित्व गर्दै विभिन्न खेलमा स्वर्णपदक विजेता खेलाडीहरू र वडाका ज्येष्ठ नागरिकहरूलाई सम्मान गरिने सचिव सुनिल सुब्बाले जानकारी दिए । सचिब सुब्बाका अनुसार साँझको लागी आबश्यक खर्च करिब १६ लाख ८० हजार रुपैया धरान १९ का हङकङबासीहरुको सहयोग रहने जानकारी दिए ।

८५ वर्ष उमेर माथिका वडा ज्येष्ठ नागरिकहरूलाई अभिनन्दन र दुर्व्यसनबाट पीडित विपन्न ३ जना युवाहरूलाई सुधार केन्द्रमा लाग्ने शुल्क प्रदान गर्ने र ३० घर परिवारलाई स्वास्थ्य बिमा गरिदिने घोषणा गर्न लागेको हो । कार्यक्रम धरान-१९ स्थित जिमी चोकमा अपराह्न ३ बजेदेखि सञ्चालन हुने सचिव सुब्बाले जानकारी दिए ।