गोल्डकपको ईतिहास बोकेको बुढा सुब्बा गोल्डकपको २५ औ संस्करण माघ १९ गतेदेखि

मोफसलमा अन्तरराष्ट्रिय आमन्त्रण गोल्ड कपको ईतिहास बोकेको बुढा सुब्बा गोल्डकपले आफ्नो रजत बर्ष संगै २५औँ संस्करण आउँदो माघमा हुने भएको छ । प्रतियोगीताको बारेमा जानकारी दिन सोमबार धरानमा आयोजित पत्रकार सम्मेलनमा प्रतियोगीता यही माघ १९ देखी २६ गतेसम्म हुने जानकारी गराइएको छ । प्रतियोगितामा लिग च्याम्पियन चर्च ब्वाइज क्लब, एनआरटी क्लब काठमाण्डौ, नेपाल पुलिस क्लब, भुटान फुटबल एकाडेमी, त्रिभुवन आर्मी क्लब, इटहरी जागृती क्लब, युके एफसी भारत, मच्छिन्द्र क्लब काठमाण्डौ, काँकडभिट्टा फुटबल ट्रेनिङ सेन्टर झापा, र धरान फुटबल क्लब रहने आयोजक धरान फुटबल क्लबका अध्यक्ष प्रताप तामाङले जानकारी दिए ।

प्रतियोगिताको विजेताले ट्रफीसहित १० लाख र उपविजेताले पाँच लाख रुपैयाँ पुरस्कार पाउने छन् । उत्कृष्ट खेलाडीले एक लाख र हरेक खेलको प्लेयर अप दी म्याच हुनेले १५ हजार, सर्वाधिक गोलकर्ताले ३५ हजार, उत्कृष्ट गोलरक्षक, उत्कृष्ट डिफन्स, उत्कृष्ट मिड फिल्डर, उत्कृष्ट स्ट्राइकर, उत्कृष्ट प्रशिक्षकले जनही २५ हजार रुपैयाँ पुरस्कार पाउने अध्यक्ष तामाङले बताए ।

प्रतियोगिता आयोजनाका लागी अहिले देश बिदेशमा रहेका धरानेहरुबाट सहयोग प्राप्त भैरहेको महासचिव नबिन राईले जानकारी दिए । यसैगरी प्रतियोगितामा उपविजेताले पाउने पाँच लाख धरान निवासी हाल पोर्चुगलमा बस्ने अरुण राईले गरेका छन । प्रतियोगिता ८० लाख १० हजार खर्च हुने अनुमान गरिएको छ भने एक करोड दुई लाख २५ हजार रुपैयाँ आम्दानी हुने लक्ष्य राखेको क्लबका महासचिव राईले बताए ।