धरान उत्सव भव्य उदघाटन, राजनीतिक दलद्वारा अघोषित बहिस्कार

धरान स्थापनाको १२३ औ स्थापना दिवस भव्य रुपमा उदघाटन भएकोछ । प्रमुख अतिथीको रुपमा प्रधानमन्त्री पुष्पकमल दाहाल प्रच्ण्डलाई निम्ता दिएपनी व्यासतताको कारण आउन नसकेपछी स्थानिय धरान ९ कि १०३ बर्षीय चन्द्रमाया कटवालको प्रमुख आतिथ्यतामा उदघाटन समारोह सम्पन्न भएको थियो । तर कुनै सुचना र चर्चा नगरी कार्यक्रमको बिशेष अतिथीको रुपमा भने काठमण्डौ महानगरपालिका का मेयर बालेन शाह को शानदार रुपमा उपस्थिती रहेको थियो । यो धराने जनताको लागी सर्प्राइज थियो । कार्यक्रम चलिरहदा समेत आउँदैछन भनेर जानकारी दिएको थिइएन । कार्यक्रममा प्रदेश सांसद,पुर्व सांसद हरु, स्थानिय जनप्रतिनिधीहरु को उपस्थित भएपनी धरानका राजनीतिक दलहरु भने कार्यक्रममा उपस्थित थिएनन ।

कार्यक्रम उदघोषकले राजनीतिक दलहरु र नेताहरुको नाम पटक पटक उल्लेख गरे पनी उनिहरु मन्चमा देखिएनन । उनिहरुको उपस्थिती नदेख्दा राजनीतिक दलहरुले धरान उत्सब -२०८० को कार्यक्रमहरु अघोषित रुपमा बहिस्कार गरेको स्पस्ट देखिएको थियो । क्रियाशील ५ राजनीतिक दलका स्थानीय नेतृत्वहरू उपस्थित भएनन् । उपमहानगरपालिकाले दल र दलका स्थानीय नेताहरूलाई उपस्थितिका लागि निमन्त्रणा-पत्र पठाइएको दावी गरेपनी । नेपाली काँग्रेसका उपमहानगर सभापति श्याम पोखरेलले भने ‘मैले निमन्त्रणा पत्र नपाएकाले नगएको हुँ ।’ उनले पार्टीबाट निर्वाचित वडाध्यक्षहरू समारोहमा उपस्थित थिए । अन्य दलका स्थानीय नेतृत्वहरू पनि समारोहमा नगएको आफूले थाहा पाएको बताए । पूर्व मेयर, उपमेयरहरू पनि अनुपस्थित थिए ।

कार्यक्रमका बिशेष अतिथी बालेन शाहले शुभकामना मन्तव्यमा धरानबासी र मेयर हर्क राज राई (हर्क साम्पाङ) साम्पाङको कामको प्रशंसामा गरिरहे । उनले धरानको बारेमा वाल्यबस्था देखीनै जानकार रहेको भन्दै धरान काठमण्डौ भन्दा तीन कुरामा सधैं अगाडी रहेको बताए । उनले धरान फेशन, श्रम संस्कृति, घोपा क्याम्प र सफा बाटोघाटोमा काठमाण्डौ भन्दा अगाडी रहेको भन्दै चर्चा गरे ।उनले गीतसंगीतमा पनि धरान अग्रणी रहेको भन्दै वरिष्ठ गायक दिप श्रेष्ठ र सविन राईलाई सम्झिए । गायक दिप श्रेष्ठलाई सम्मान गरिएको थियो । उनले गायक श्रेष्ठलाई भेट्न पाउदा खुशी लागेको पनि बताए ।

उद्घाटन समारोहमा धरानको सबै वडाबाट विभिन्न सङ्घ संस्था, विद्यालय सांस्कृतिक झाँकी सहितको र्‍यालीमा सहभागी थिए । पब्लिक हाई स्कुलबाट निस्किएका झाँकी सहितको र्‍याली छाता चोक, टेलिकम हुँदै पुरानो बजार, भानुचोक पुतलीलाईन, सब्जिमण्डी हुँदै पुन: पब्लिक स्कुलमा पुगेर औपचारिक कार्यक्रम सुरु भएको थियो । र्‍यालीमा धरानका जातीय संस्थाहरूको सहभागिता थियो ।समारोहमा उत्कृष्ट कर बुझाउने करदाताहरू चेतन अग्रवाल, साबित्रा घले, चिरञ्जीवी अग्रवाल, दिनेश अग्रवाल, निशान्त श्रेष्ठ, कृष्णप्रसाद श्रेष्ठकालाई सम्मान गरियो । समारोहमा कोशी प्रदेशका सांसदद्वय रमेशकुमार बस्नेत, विजयकुमार राई, पोखरा महानगरपालिका मोतीलाल तिम्सिना लगायतले शुभकामना प्रकट गरेका थिए ।

कार्यक्रममा धरान उपमहानगरपालिकाका उपमेयर आइन्द्र विक्रम बेघाले धरान १२३ वर्ष अगाडि १९५७ सालमा चन्द्र शमशेरले बसाएको बस्तीको विकसित रूप भएको बताए । उनले पुर्व राजा पृथ्वी नारायण शाहको वाणी स्मरण गरे । उनले धरान ४ जात छतिस बर्णको फुलबारी जस्तो हो । हामी यहाँ मिलेर बसेपनी केही व्यक्तीहरुले हिलो छ्याप्न खोजेको आरोप लगाए । उनले आफुहरु निर्वाचित भएर आएदेखी नै धरानको आवश्यकता पहिचान गरी, दिनरात लागिरहेको बताए ।

कार्यक्रमका सभापती तथा मेयर हर्क राज राई (हर्क साम्पाङ) ले आफु खुशी भए यहिनै बिकास भएको दावी गरे । आत्मसन्तुस्टी मिल्न सक्ने काममा संलग्न भएर आफुलाई खुशी बनाउन दावी गरे । धरान बनाउन, हाम्रो सबै समस्या समाधान गर्न हामी लागि पर्न पर्ने आग्रह गरे । उनले धरान स्थित विपि कोईरला स्वास्थ्य विज्ञान प्रतिष्ठान धरान लाई धरानकै मातहतमा दिए आफुहरुले सुधार गर्ने दावी गरे । उत्सवमा बिशेषगरी धरानलाई चिनाउने खाना, जातिय परिकार, यहाँको स्थानीय उत्पादन लगायत मुख्य आकर्षणका रहेकाछन । । यस बर्ष बिशेषगरी स्वास्थ्य क्षेत्रलाई ध्यान दिएर पाचै दिन स्वास्थ्य शिविर, एम्बुलेन्स सेवा उपलब्ध रहेकोछ ।

उत्सवमा सरसफाइ अभियान, जातीय र्याली,सहकारी क्रियाकलाप,सम्मान कार्यक्रम साइकिलिङ,साहित्यिक,सम्मान कार्यक्रम,वाकाथुन,विद्यालय खेलकुद प्रतियोगिताहरु,लोकदोहोरी, श्रमदाता र्याली,झाँकि प्रदर्शनी कार्यक्रम, लगानी गोष्ठी सञ्‍चालन,रस्सी तान प्रतियोगिता,कदरपत्र तथा प्रशंसा कार्यक्रम हुने भएको छ । उत्सवमा प्रवेश निशुल्क रहेकोछ । हरेक साझ बिशेष सांगितिक र सांस्कृतिक कार्यक्रमहरु आयोजना भैरहेको छन ।