“रिमै” ट्रेलर सार्वजनिक, गुरुङ गाउँको सम्बन्ध र संस्कृतिको कथा पेश

सफल चलचित्र “कबड्डी”बाट जोडीको रुपमा अत्यधिक रुचाइएको काजी र मैयाको जोडी अर्थात दयाहाङ राई र रिश्मा गुरुङको मुख्य भुमीका रहेको चलचित्र “रिमै” को ट्रेलर सार्वजनिक भएको छ । पश्चिम नेपालका गुरुङ समुदायको वैवाहिक परम्परालाई मुख्य बिषयबस्तु बनाएर निर्माण् गरिएको “रिमै” मा “कबड्डी” बाट निकै रुचाइएको जोडी रिश्मा र दयाको जोडी देख्न सकिन्छ । यो चलचित्रमा “कबड्डी” का लगभग कलाकारहरु रहेका छन ।

“रिमै” गुरुङ गाउँको सम्बन्ध र संस्कृतिको कथा हो । “रिमै” शब्द गुरुङ समुदायको शब्दकोषबाट लिईएको शब्द हो, गुरुङ भाषामा “रि “ को अर्थ चेलिबेटी वा मायालु भन्ने हुन्छ भने “मै” को अर्थ हरु भन्ने हुन आउँछ अर्थात रिमै भनेको चेलिबेटीहरु अर्थात मायालु भनिएको हो । यहि शब्द रिमैलाई गुरुङ जातीको संस्कार, गाउँले परिवेशको त्रिकोणात्मक प्रेमलाई निर्देशक खिलबहादुर गुरुङले गज्जवले प्रस्तुत गरेका छन । “रिमै” लाई कबड्डी, जारी र मनसराजस्ता सफल चलचित्रका लेखक तथा निर्देशक उपेन्द्र सुब्बाले लेखेका हुन ।

करीब साढे तीन मिनेट लामो ट्रेलरमा दयाहाङ राईलाई ग्रामीण परिवेशमा देखाइएको छ, जहाँ उनी आफ्नो प्रेम र परिवारबीचको संघर्षसँग जुधिरहेका छन् । रिश्मा गुरुङसँगको केमिस्ट्रीले ट्रेलरलाई भावुक बनाएको छ भने अर्पण थापा र गौमाया गुरुङको भूमिकाले कथालाई अझ रोचक बनाएको छ ।वीरवल घले कार्यकारी निर्माता रहेको सिनेमामा टिका गुरुङ, जित यात्री गुरुङ र दुन बहादुर घले निर्माता तथा बिनु गुरुङ, रोशन भट्टराई र राजेश घिमिरे सह–निर्मातामा छन् ।सिनेमामा दीपक शर्मा र थानेश्वर गौतमको संगीत, किरण चाम्लिङ राई मुख्य सहायक निर्देशक, बिष्णु मैनाली प्रोडक्सन म्यानेजर र मित्र डि गुरुङको सम्पादन रहेको छ । चलचित्र यहि भदौ २० गतेबाट प्रदर्शनमा आउदै छ ।