टिजर र दुई गीत हिट भएपछि चलचित्र ‘मोहर’ को प्रचार बुटवलबाट सुरु

ट्रेलर रिलिजको तयारी रहेको यहि साउनको २३ गतेबाट रिलिजमा आउन लागेको चलचित्र ‘मोहर’को प्रचार – प्रसार बुटवलबाट सुरु भएको छ । प्रचार –प्रसारको लागि नायक पल शाह र नायिका बेनिशा हमाल बुटवल पुगेका छन । यो चलचित्रमा समावेश ‘झुम झुम’ बोलको गीतले दर्शकको साथ पाइरहँदा पल र बेनिशा दर्शकसँग यही गीतमा नाँचिरहेका छन् । यसैबिच, पल र बेनिशा पश्चिम नेपालको बुटवल पुगेका छन् । जहाँ, उनीहरुले दर्शकसँग फिल्मको बिषयमा साक्षात्कार गरेका छन् । चलचित्रको टिजर र दुई गीतलाई दर्शकले मन पराएका छन ।

फिल्मका लेखक तथा निर्देशक ओम प्रतिक, निर्माता चुम्बन जंग शाही, फिल्मका मुख्य सहायक निर्देशक गिरिराज घिमिरेको साथमा नायक पल शाह र नायिका बेनिशा हमाल बुटवलका क्याम्पस र स्कुलमा पुगेका हुन् ।दर्शकसँग साक्षात्कार गर्ने क्रममा नायक पलले ‘मोहर’ सबै परिवारले हेर्ने कथा भएको बताए । कार्यक्रममा पलले फ्यानहरुसँग साक्षात्कार पनि गरे । पलले भने–‘एउटा कलाकारले कमाउने भनेकै दर्शकको माया हो । यो माया सजिलै कमाउन सकिदैन ।’फिल्मको टिमले कलेज, स्कुलसँगै रोट्राक्टमा आवद्ध विभिन्न व्यक्तिहरुसँग पनि साक्षात्कार गरेको थियो ।

पल र बेनिशालाई भेट्न पाउँदा दर्शक उत्साहित देखिए । उनीहरुले, ‘मोहर’को प्रतिक्षा व्यग्र रुपमा गरिरहेको बताएका थिए ।
देउकी प्रथामा आधारित रहेर तयार पारिएको यो फिल्ममा पल र बेनिशाको साथमा नीति शाह, अर्जुन जंग शाही, रवीन्द्र झा लगायतका कलाकारहरुको अभिनय छ ।फिल्म मेकर्स प्रा।लिको व्यानरमा निर्माण भएको मोहर बक्स अफिसमा उत्साहजनक व्यापार गर्ने अपेक्षा गरिएको छ । फिल्मको टिजर र दुई गीतलाई दर्शकले मन पराइसकेका छन् । केही दिनमै फिल्मको ट्रेलर सार्वजनिक गर्ने तयारी निर्माणपक्षको छ ।