‘होस्टेल ३’को ट्रेलर,विश्वका १३ देशमा ट्रेन्डिङमा, नेपाल र कुवेतमा पहिलो नम्वरमा

सफल चलचित्र ‘होस्टेल’ को तेस्रो सिक्वेल चलचित्र ‘होस्टेल -३’को ट्रेलर रिलिज भएको छ । ठुलो पर्दाका लागी फ्रेश कलाकारहरुलाई डेव्यु गराएर निर्माण गरिएको चलचित्र ‘होस्टेल -३’ को ट्रेलर २४ घण्टामै विश्वका १३ देशमा ट्रेण्डिङमा परेको छ । ट्रेण्डिङ मध्ये नेपाल र कुवेतमा भने पहिलो ट्रेण्डिङमा रहेको छ । नेपाल र कुवेतमा पहिलो स्थान हासिल गरेको यस ट्रेलरले विशेष गरी खाडी मुलुकहरू, युरोपियन देशहरू, बेलायत, जापान, अस्ट्रेलिया तथा कोरियामा यसको उल्लेखनीय प्रभाव देखिएको छ।

कतारमा दोस्रो, पोर्चुगलमा तेस्रो, साउदी अरेबियामा चौथो, रोमानिया र संयुक्त अरब इमिरेट्स (UAE) मा पाँचौँ स्थान ओगट्न सफल भएको छ । यस्तै जापान र अस्ट्रेलियामा सातौँ स्थान, माल्टामा पनि सातौँ स्थान, मलेसियामा एघारौँ स्थान, दक्षिण कोरियामा चौधौँ स्थान, र बेलायत (UK) मा अट्ठाइसौँ स्थान ओगटेको छ । यही फागुन २३ गते रिलिज हुने तयारीमा रहेको नेपाली चलचित्र ‘होस्टेल ३’को ट्रेलर सार्वजनिक भएसँगै यसले विभिन्न रेकर्डहरू कायम गर्न थालेको छ । १० लाख भ्युज पुग्दासम्म यसले ४२ हजार भन्दा धेरै लाइक्स र ३ हजार ४ सय भन्दा धेरै प्रतिक्रियाहरू प्राप्त गरेको थियो ।

यो तथ्याङ्क हेर्दा यस चलचित्रको ट्रेलरले नेपालसहित नेपालीहरूको बसोबास रहेका विश्वका विभिन्न देशहरूमा उल्लेख्य प्रभाव छोडेको छ । चलचित्रका निर्देशक सशान कँडेलले अर्ग्यानिक रूपमा आइरहेको भ्युज देख्दा आफ्नो सपना पुरा भइरहेको महसुस गरेको बताए ।“ट्रेलरले प्राप्त गरेको अपार मायाले हामीलाई अत्यन्त हौसला प्रदान गरेको छ । १३ देशमा ट्रेन्डिङ हुनु र छोटो समयमै १० लाख भ्युज पार गर्नु नेपाली सिनेमाका लागि गर्वको विषय हो । दर्शकहरूबाट अर्ग्यानिक रूपमा प्राप्त यो माया हाम्रो मेहनतको प्रतिफल हो । चलचित्रलाई अझ राम्रो बनाउन हामीले गरेको प्रयास सफल भएको महसुस गर्दैछु । सम्पूर्ण दर्शक, शुभचिन्तक, र टिमलाई हार्दिक धन्यवाद,” निर्देशक कँडेलले बताए ।

ट्रेलरले कलेज तथा होस्टेल जीवनका अनुभव, रमाइला क्षणहरू तथा चुनौतीपूर्ण परिस्थितिहरूलाई प्रस्तुत गरेको छ । ट्रेलरमा मुख्य भूमिकामा पारस बम ठकुरी, सिम्रन पन्त, आशिष घिमिरे, पदम तामाङ, हेना नगरकोटी, रिहान गिरी, समा पराजुली लगायत रहेका छन् । अभिनेता प्रवीण खतिवडा वार्डेनको भूमिकामा छन् भने आशिष पुरुष, रोहन श्रेष्ठ, उमर खान र सन्तोष बानियाँ पनि ट्रेलरमा देखिन्छन् ।

चलचित्रको निर्देशन सशान कँडेलले गरेका छन्, जो दुई दशकदेखि सङ्गीत तथा म्युजिक भिडियो निर्देशनमा सक्रिय छन् । चलचित्रको कथा माधव शर्माले लेखेका हुन्, जसले एसोसियट निर्देशकको भूमिका पनि निभाएका छन् । चलचित्रका निर्माता सुरेश कँडेल, कर्ण कार्की, गोविन्द अधिकारी हुन् भने सह-निर्मातामा शिशिर ज्ञवाली, अनीश सिग्देल, कुन्दन गुप्ता र गणेश मगर रहेका छन् । कार्यकारी निर्माता शङ्कर कोइराला हुन् भने लाइन प्रोड्यूसर कोसिस राज क्षेत्री रहेका छन् ।

चलचित्रको छायाङ्कन निर्देशन अर्जुन तिवारीले गरेका छन् भने सम्पादन विकास दाहालले गरेका छन् । चलचित्रका एक्सन निर्देशक हिमाल केसी हुन् । सङ्गीतमा अर्जुन पोखरेल, अल्मोडा राणा उप्रेती, महेश ज्ञवाली र किरण माइकल छन् । नृत्य निर्देशन प्रवीण सिंह र रोशन विश्वकर्माले गरेका छन् ।चलचित्रको वितरण काठमाडौं उपत्यकामा काफिया फिल्म्स (गोविन्द शाही) र उपत्यका बाहिर आरआर फिल्म्स (रोहित कट्टेल, रत्न श्रेष्ठ) ले गर्नेछन् ।