पौष १५ गतेबाट छायाङ्कनमा जाने चलचित्र ‘सोल्टिनी’ को पोस्टर सार्वजनिक

चलचित्र निर्माण घोषणाको एक छोटो भिडियो सार्वजनिक भएपछी चर्चा कमाउन सफल निर्माणधिन चलचित्र ‘सोल्टिनी’ को अफिसियल पोस्टर सार्वजनिक भएको छ । सार्वजनिक पोस्टरमा चलचित्रका मुख्य कलाकार प्रकाश सपुत र परिक्षा लिम्बुलाई प्रस्तुत गरिएको छ । पोस्टरमा जोडी भावुक मुडमा देखिन्छन । यो पोस्टर हेर्दा चलचित्रले प्रेम, मिलन र बिछोडको कथा बुन्ने प्रस्ट हुन्छ । प्लानेट थ्री फिल्म्सको प्रस्तुति तथा नेपसिनेको र योलो इन्टरटेन्मेन्टको सहकार्यमा बन्न लागेको यो चलचित्र यही पौष १५ गतेबाट छायाङ्कनमा जाने निर्माण टीमले जनाएको छ । हाल चलचित्रका कलाकार र प्राविधिक टोलीको वर्कसप चलिरहेको ‘सोल्टीनी’ लाई ‘रङ्गेली’ निर्देशन गरेका अर्जुन सुवेदीले निर्देशन गर्दैछन ।

पहाडी जिल्ला भोजपुरको एक गाउको कथा लाई लिएर चलचित्र ‘सोल्टिनी’ निर्देशन गर्ने भएका छन । चलचित्र पूजार सार्की बाट उदाएकी परिक्षा लिम्बु र चर्चित गायक तथा कलाकार प्रकाश सपुतको मुख्य भूमिका रहने ‘सोल्टीनी’ ले भोजपुरको एक गाउको पोखरेल थरका भिमसेन पोखरेल(प्रकाश सपुत ) र राई थरकी दिलाशा राई ( परिक्षा लिम्बु) बिचको अन्तरजातीय प्रेम कथालाई पर्दा उतार्ने तयारी भएको सोमबार सार्वजनिक गरिएको परिचयात्मक भिडियोले प्रस्ट पारेको छ ।

जातीय भेदभाव र अपुरो प्रेमको संवेदनशील कथा उठान गरिने चलचित्रमा चर्चित कथा वाचक साइग्रेस पोखरेलको मार्मिक कथा वाचनले चलचित्रको भाव व्यक्त गरेको छ । वाचनमा उनले भनेका छन्, “मानिसबाट मानिसलाई हुने छि छि दुरदुर, अमानवता र जातीय भेदभाव मेटाउन कसैले त कलम अगाडि बढाउनै पर्छ, कि त पैताला जलाउनै पर्छ ।”

यसबाट चलचित्रले समाजमा विद्यमान अमानवीयता र जातीय भेदभावलाई उजागर गर्दै यस विरुद्ध आवाज उठाउने कथा प्रस्तुत गर्ने सङ्केत गरेको छ ।रिलिज मिति पनि २०८२ सालको असोज ३ गते संविधान दिवसको दिनलाई तोकिएको चलचित्रलाई प्लानेट थ्री फिल्म्सको प्रस्तुति तथा नेपसिनेको र योलो इन्टरटेन्मेन्टको सहकार्यमा बन्न लागेको हो ।