निर्माता ज्योतिराजको परिवारद्वारा अन्तर्राष्ट्रिय गोल्डकपलाई ट्रफी प्रदान

यही असोज ११ देखि १९ गतेसम्म आयोजना हुने बेलबारी आरजु राइस अन्तर्राष्ट्रिय आमन्त्रण गोल्डकप फुटबल प्रतियोगिताको बिजेताका लागी ८ लाख बराबर ट्रफी सार्वजनिक भएको छ । आयोजक एलएक्ससिटी फुटबल क्लबले बेलबारी नगरपालिकाको सभाहलमा आइतबार पत्रकार सम्मेलन आयोजना गरी गोल्डकप सार्वजनिक गरेको हो । उक्त ट्रफी नेपाल चलचित्र विकास बोर्ड अन्तर्गत आदिवासी जनजाति मातृभाषी चलचित्र प्रवर्द्धन समितिका संयोजक तथा चलचित्र निर्माता ज्योतिराज राईले पत्रकार सम्मेलनमा आयोजकलाई हस्ताण्तरण गरे । अढाई किलो चाँदीमा दुई तोला सुन जडित गोल्डकप ट्रफी राईका स्व. बुवा मेजर एन. बि. रुङमाहाङ राईको स्मृतिमा आफुसंगै परिवारका सदस्य पोपिराज राई, पबित्रा राई, सरला राई र नानू राई को तर्फबाट सौजन्य गरेको जानकारी गराए ।

ट्रफी आयोजक एल एक्स सिटी फुटबल क्लबका अध्यक्ष बिक्रम बान्तावा राई र बेलबारी नगरपालिकाका मेयर दिल प्रसाद राईले संयुक्त्त रुपमा ग्रहण गरे । ट्रफी हस्ताण्तरण पछी आफ्नो कुरा राख्दै निर्माता ज्योती राज राईले आफ्नो जन्मथलोमा योगदान दिन पाउँदा गर्वको लागेको बताए । साथै, उनले २०४८/४९ सालमा आफ्ना बुवाको नाममा नकआउट फुटबल खेलको आयोजना गरेको स्मरण गराउदै केही समय स्थगित भएपनी पुर्णता दिन नसकिरहेको अवस्थामा अहिले फेरि यो खेलमा संलग्न हुन पाउँदा आफ्नो परिवारको लागि ऐतिहासिक क्षण भएको उल्लेख गरे । साथै यस्तो सूवर्ण अवसर प्रदान गर्न सूझाब र सहयोग गर्नूहुने गोबिन्द भन्डारी सर ,एल एक्स सिटी फुटबल क्लबका अध्यक्ष बिक्रम बान्तावा राई लगायत सम्पुर्ण सूभ चिन्तक र टीम प्रती धन्यवाद दिए ।

गोल्डकप असोज ११ देखि १९ गतेसम्म बेलबारी ११ को लक्ष्मी खेल मैदानमा हुँदैछ । सातौँ संस्करण देखि प्रतियोगिता लगातार तीन पटक जित्ने टिमले गोल्डकप पचाउनेछन् ।पहिलोपटक १० टिमले सहभागिता जनाउने प्रतियोगितामा नेपाल पुलिस क्लब, बुटवल लुम्बिनी फुटबल क्लब,भारतको दलसिंहपारा फुटबल क्लब,विग्रेड ब्वाइज र आयोजक एलएक्ससिटी फुटबल क्लबले पोल ‘बी’ बाट प्रतिस्पर्धा गर्नेछन् । खेल आयोजना गर्न ६० लाख रुपियाँ खर्च हुने अनुमान गरिएको छ । प्रस्तावित रङ्गशालामा ३५ सय दर्शक अटाउने अस्थायी प्याराफिट निर्माण भइसकेको क्लबका उपाध्यक्ष ज्ञानुराज राईले जानकारी दिए ।