प्रकाश सपुतको ‘बसन्त’ आफ्नै जन्मथलो बाग्लुङको धम्जा गाउँमा छायांकन सुरु

गायक प्रकाश सपुतको डेब्यु निर्देशन रहने चलचित्र ‘बसन्त’ को छायांकन आजबाट सुरु भएको छ । २५ दिनको सेड्युएल लिएर प्रकाशको जन्मथलो बाग्लुङ को धम्जा गाउँबाट छायांकन सुरु भएको छ । प्राय आफ्नो सिर्जनाहरुलाई फरक तरिकाले गर्न रुचाउने सपुतले ‘बसन्त’ को शुभमुर्हत पनि फरक तरिकाले गरेका छन । छायांकन हुनु भन्दा अगाडी निर्माण टिमले शान्ती पदयात्राको आयोजना गरेको थियो । शान्ती पदयात्राको संयोजन कालिका भगवती गुठीले गरेको थियो । छायांकनअघि कालिका मन्दिरमा शुभसाइत पूजा गरियो । धम्जामा निर्माण टिम २५ दिन सम्म रहनेछन । दशैंतिहारको बीचमा राजधानी काठमाडौं र तराईका विभिन्न लोकेसनमा छायांकनको तयारी छ । फिल्मलाई सुसन प्रजापतिले छायांकन गर्नेछन् ।

गलबन्दी प्रोडक्सनको प्रस्तुति रहने सिनेमामा प्रकाश घिमिरे, अनुप बराल र कमलमणि नेपाल पनि अभिनय रहनेछ । सिनेमाको कथा लेखन र संगीतको काम प्रकास स्वयंमले गरेका हुन् । सिनेमाको कार्यकारी निर्मातामा मोहन विश्वकर्मा, अनुरोध भट्टराई र नाना थकाली छन् । छायांकनका लागि सिनेमाको कलाकार सहितको टिम छायांकन स्थल पुगिसकेको छ ।

चलचित्र यही बर्षको चैते दशैंको अवसर पारेर आगामी चैत २२ गतेबाट विश्वव्यापी प्रदर्शनमा आउँदै छ । फिल्ममा स्वस्तिमा र प्रकाशसहित प्रभात पाल ठकुरी, खड्कबहादुर पुन, शिवांशी श्री लगायतको अभिनय हुनेछ । अनुप बराल, कमलमणी नेपाल, प्रकाश घिमिरेको समेत यसमा अभिनय हुनेछ । यो सोसल ड्रामा फिल्ममा निर्देशनसहित पटकथा र संगीत पनि सपुतकै हुनेछ ।