मिलन चाम्स निर्देशित चलचित्र ‘अञ्जिला’ को प्रदर्शन मिती सर्यो

चर्चित निर्देशक मिलन चाम्सद्वारा निर्देशीत महिला राष्ट्रिय फुटबल टिमकी गोलरक्षक एञ्जिला तुम्बापो सुब्बाको जीवनीमा आधारित रहेर निर्माण गरिएको चलचित्र ‘अन्जिला’ को प्रदर्शन मिती सरेको छ । पोस्टर रिलिज संगै माग ११ गतेको लागी प्रदर्शन मिती तोकेको चलचित्र अब फागुन २९ गतेबाट प्रदर्शनमा आउने भएको छ । हाम्रो योजना तोकिएकै मितीमा प्रदर्शन गर्ने थियो तर सबै पक्षहरू मिलाउने क्रममा रिलिज मिति सार्नु परेको निर्देशक चाम्सले जानकारी दिए । छायांकन एञ्जिलाकै जन्मथलो इलामको आइतबारे, झापा र काठमाडौंमा गरिएको छ ।

सिनेमा एञ्जिलाको बाल्यकालदेखि खेल जीवनसम्मको संघर्ष र सफलताको कथामा आधारित छ । जसले इच्छाशक्ति भए असम्भव केही छैन भन्ने सन्देश दिने प्रयास गरेको जानकारी निर्माण टिमले दिएको छ । चलचित्रमा अन्जिला संगै दयाहाङ राई, सिर्जना सुब्बा, माओत्से गुरुङ, बुद्धि तामाङ बिजय बराल लगायतका कलाकारको अभिनय रहेको छ । निर्माता प्रेम कुमार श्रेष्ठले पनि सिनेमामा मुख्ख भूमिका निर्वाह गरेका छन् ।मुन लभ इन्टरटेन्मेन्टको ब्यानरमा प्रेम श्रेष्ठले निर्माण गरेका हुन् । विनोद अग्रवाल र राजेश बगडिया सह–निर्माता हुन् । सिनेमामा सुदीप बरालको डिओपी, मिलन श्रेष्ठको सम्पादन रहेको छ ।