हिम्मतवाली रेखा ‘उपहार’ मा चियावाली बनेपछी, बाकी ट्रेलरमा हेर्नुस् (भिडियो )

यही फागुन २५ गतेदेखी प्रदर्शनको तयारीमा रहेको बहुप्रतिक्षित चलचित्र ‘उपहार’ को ट्रेलर सार्वजनिक भएकोछ । ट्रेलरको सुरुमै काठमाण्डौ महानगरपालिकाका मेयर बालेन शाहले पछील्लो समय चलाएको डोजर अभियानलाई देखाइएको छ । सडकमा बनेका अनाधिकृत संरचना हटाउने देखी खुद्रा ब्यापारीहरुलाई उठाएको कथा प्रस्तुत गर्ने कुरा ट्रेलरले प्रस्ट देखाएकोछ । सिनेमामा केही कमेडी सिन संगै गम्भिर विषय रहेको संकेत ट्रेलरले देखाएको छ । ट्रेलरमा अभिनेत्री रेखा थापालाई चिया बेच्दै काठमाडौंमा संघर्ष गरेर स्थापित हुन खोजेकी पात्रका रुपमा प्रस्तुत गर्दा ट्याक्सी ड्राइभर मुकुन सँगको प्रेम सम्बन्धलाई गज्जबले प्रस्तुत गरिएको आकलन गर्न सकिन्छ । ट्रेलरमा देखाइए अनुसार पूजालाई कलेज गर्ल र नारी अधिकारको लागी लडिरहेको वेनिशालाई वकिलको भूमिका प्रस्तुत गरिएको छ । सुरुमा कमेडी, रोमान्टीक हुँदै,अन्तमा बियोगान्त अवस्थामा ल्याएको कथा प्रस्तुत गरेको उपहारले पुराना सिनेमाको जस्तो कथा प्रस्तुत गर्दा पुराना सिनेमाको झल्को आउछ । यस अघी रिलिज भएका गीतहरु पहिलो डान्सिङ, त्यसपछी रोमान्टिक र अन्तिममा टाइटल गीत बियोगान्त गीत आएको थियो जुन पहिलेका नेपाली सिनेमाहरुमा प्रयोग हुँदै आएको थियो ।

चर्चित नायिका रेखा थापाको प्रस्तुती रहेको चलचित्र ‘उपहार’ को शिर्षक सँग मिल्ने शिर्ष गीत बढो मार्मिक बनेकोछ । गीत फिल्मको अन्तिम क्लाइमेक्समा बज्ने प्रस्ट हुन्छ । गीतमा फिल्मका मुख्य पात्रहरुको रुवावासी छ् । गीतले फिल्म कथासार बोलेकोछ । अभिनेत्री थापाका श्रीमान् बलराम शाही ठकुरी कार्यकारी निर्माता रहेको सिनेमाका निर्माता सुलभ प्रतिक र समीक्षा देउजा हुन् । रेखा फिल्मस् र कपनगढी फिल्मस्को ब्यानरमा निर्माण भएको सिनेमामा विष्णु कल्पित घिमिरेको छायांकन, अर्जुन पोखरेल र बाबुल गिरीको संगीत, मित्र डि गुरुङको सम्पादन, सुलक्षण भारतीको कथा, भारतीका साथै अभिमन्यू निरवी र माधव शर्माको पटकथा तथा संवाद, अनुपम गौतमको भीएफएक्स र रोशन श्रेष्ठको द्वन्द्व निर्देशन छ । करण श्रेष्ठको रिच इनटरटेनमेन्टले काठमाडौं र एफडी कम्पनीले मोफसलमा वितरण गर्ने सिनेमामा संगीतकार अर्जुन पोखरेलको पनि संगीत रहेको छ ।’उपहार’ जर्नी अफ लाइफ हरेक दर्शकहरुको सुन्दर उपहार बनेको निर्माण टीमको दावी छ ।ज्ञानेन्द्र देउजाको निर्देशनमा निर्माण भएको ‘उपहार’मा मुकुन भुषाल, तेज गिरी, समर्पणजंग कार्की शिशिर राणा, सुष्मा कार्की, अंशु महर्जन, आशा भुुषाललगायतको पनि अभिनय छ । फिल्म यही फागुन २५ गतेबाट देशभर प्रदर्शनमा आउँदैछ ।