कानुनको पालना गर्न प्रतिबद्ध रहेको एनसेलको भनाइ

यती बेला एनसेल सेयर बिक्री प्रकरणको विषयमा चौतर्फी आलोचना भैरहेको छ । संसदको सार्वजनिक लेखा समितिले विवादित बनेको एनसेलको शेयर खरिदबिक्री तत्काल रोक्न निर्देशन दिएको छ । नियामक निकाय नेपाल दूरसञ्चार प्राधिकरणलाई पूर्व जानकारी गराउनुपर्नेमा पहिले जानकारी नगराइ अहिले आएर जानकारी गराउँछु भनेकाले कानुनी व्यवस्थाको परिपालना नगरिएको समितिको ठहर छ । तर सेयर खरिदबिक्रीबारे सवत्र शङ्का भैरहँदा एनसेलले कानुनको पूर्ण पालना गर्न प्रतिबद्ध रहेको जनाएको छ । अहिलेसम्म सबै कर दायित्वहरु पूर्ण रुपमा पालना गरेको र थप कर तिर्नुपर्ने भएमा कानुनअनुसार तिर्न तयार रहेको एनसेलको भनाइ छ ।एनसेलले विज्ञप्ति निकालेर नेपाली उपभोक्तालाई आधुनिक र उच्च गुणस्तरको सेवा दिन तथा डिजिटल नेपालको लक्ष्य पूरा गर्नको लागि सरकारलाई योगदान पुर्‍याउन प्रतिबद्ध रहेको पनि जनाएको छ । आवश्यक सहमतिका लागि दूरसञ्चार प्राधिकरणसँग छलफल भैरहेको पनि एनसेलको भनाइ छ ।