बलिवुडको झल्को दिने ‘एक भागवत गीता’ को ट्रेलर युट्युब ट्रेण्डिङमा

पछील्लो समय चर्चामा रहेको बहुप्रतिक्षित चलचित्र ‘एक भागवत गीता’ को ट्रेलर युट्युब च्यानलको ट्रेण्डिङमा पर्न सफल भएको छ । आगामी भदौ २९ गतेबाट देशभर प्रदर्शनको तयारीमा रहेको ‘एक भगवत् गीता’को ट्रेलर गत शुक्रबार एक कार्यक्रमका बीच ओेएसआर डिजिटल मार्फत सार्वजनिक गरिएको थियो । सार्वजनिक ट्रेलरले सामाजिक सञ्जाल युट्युवमा दर्शकबाट उत्कृष्ट प्रतिक्रिया पाउदै ट्रेण्डिङमा स्थान बनाउन सफल भएको हो । पोस्टर रिलिज देखी टिजर हुँदै ट्रेलर रिलिज भएपछी सिनेमाको चर्चा झन्डै चुलिएको छ । टिजर रिलिज भएपछी नेपाली दर्शकले दक्षिण भारतीय मुवी को सँज्ञा दिन थालेकाछन । जनकपुरको सेटिङमा खिचिएको फिल्ममा बिपिन कार्कीलाई कमला माइ अवतरमा देखाइएको छ । रिलिज ट्रेलरमा धीरज मगर र सुहाना थापा छायामा परिरहेको आरोप लागे पनि धीरज र सुहाना को अन्तरजातीय प्रेम अर्थात पहाडी मुलको केटा र तराइकी केटी विचको प्रेम लाई प्रस्तुत गर्न खोजिएको छ । ट्रेलरमा धीरज को भूमिका नदेखाइएको आरोप लागिरहदा फिल्म धीरजनै मुख्य पात्र रहेको निर्देशक झरना थापाको दावी गरेकी छन । फिल्म भित्र रोमानन्स, लभ, मित्रता र क्रोधको कथा रहेको वुझ्न सकिन्छ ।भदौको २९ गतेबाट रिलिजमा आउन लागेको फिल्म ‘एक भगवत् गीता’मा सुनिल कुमार थापा को निर्माण र झरना थापाको निर्देशन रहेको छ ।

सिनेमामा विपिन कार्की, धिरज मगर, सुहाना थापा, कबीर खड्का, जेविस र जेविन श्रेष्ठ, संजोग रसाइली, मुकेश झा, अनुराग कुँवर, राम कैलाश ठाकुर, धिरज ठाकुरको पनि अभिनय छ ।सुनिल कुमार थापाको निर्माण रहेको सिनेमाको कन्सेप्ट अभिनेत्री सुहाना थापा र कथा निर्देशक झरना थापाको हो । झरनासँगै सरिन पोखरेल, परिक्षेद सेन, पुरुषोत्तम ढंगेल र कृष्णको पटकथा रहेको सिनेमामा परिक्षेद र पुरुषोत्तमले संवाद लेखेका छन् ।सुहाना इन्टरटेनमेन्ट र सुनिल कुमार थापा प्रोडक्सनको व्यानरमा निर्माण भएको सिनेमामा राजेश श्रेष्ठको छायांकन, मित्र डि गुरुङको सम्पादन, हिमाल केसीको द्वन्द्व, कविराज गहतराजको कोरियोग्राफी तथा शैलेश श्रेष्ठको ब्याकग्राउण्ड स्कोर, हर्कुलस बस्नेत, आशिष अविरल, प्रवेश मल्लिक र बाबुल गिरीको संगीत तथा शंकर अधिकारी घायलको शब्द रचना रहेको छ ।