‘जेरी -२’ को थिम पोस्टर सार्वजनिक

सफल चलचित्र जेरी को सिक्वेल ‘जेरी -२’ को थिम पोस्टर सार्वजनिक भएकोछ । जेरी मै भएका जोडी अनमोल केसी र आना शर्माकै मुख्य भुमिका रहने ‘जेरी २’ को पोस्टरमा एक युवालाई ब्याग बोक्दै लौरी टेकेर यात्रामा हिँडिरहेको देख्न सकिन्छ । पोस्टरको ब्याक राउण्ड देखिएको तोरण ध्वजा पताकाले यही देखाउछ कि यो यात्रा हिमाली भेग तिरको हो । सफल निर्देशक हेमराज बिसीको निर्देशनमा निर्माण हुने जेरी -२ मा पुर्णिका सिजापतीको पनि मुख्य भुमिका रहनेछ । ८ बर्ष अघि निर्माण भएको सुपरहिट सिनेमा ‘जेरी’को सिक्वेलको रुपमा यो सिनेमा निर्माण हुँदैछ ।

सिनेमामा अभिनय गर्ने अन्य कलाकारको लागि निर्माण पक्षले दार्जिलिङ, सिक्किम र गान्तोकमा अडिसन समेत गरेको थियो । अनन्या फिल्मस् र नेपकम्स ग्लोबलको ब्यानरमा निर्माण हुने ‘जेरी अन टप’लाई सरोज न्यौपाने र रामकृष्ण श्रेष्ठले निर्माण गर्नेछन । सिनेमाको कथा, पटककथा तथा संवाद निर्देशक बिसी र विश्वास तिमसिनाले लेखेका हुन् । फागुन अन्तिम साताबाट फ्लोरमा जाने सिनेमाको छायांकन अस्ट्रेलिया, अमेरिका र सगरमाथा क्षेत्रलगायतका रमणीय स्थानमा गरिने निर्माण टिमले जनाएकोछ ।